Banco Central di Aruba a publica cifranan di entrada di gobierno te cu juli 2021, a base di cual Bon Dia Aruba a reuni e cifranan di e siete lunanan inicial di aña, y mescos cu luna pasa, a haci un comparacion cu e añanan anterior, 2019 y 2020.

Ta visible cu e tendencianan señala luna pasa (articulo 05 augustus 2021) a continua, den e sentido cu entrada di diferente tipo di impuesto (invoerrechten, accijns, BBO/BAVP), ta mustra riba un mehoracion di e clima economico, mientras cu otro, specificamente entrada di loonbelasting, no ta mustra un mehoracion mes fuerte.

Den e Tabel 1 akibao ta presenta e cifranan actualiza te cu juli 2021, compara cu e mesun periodo di 2019 y 2020. Por observa cu loonbelasting despues di 7 luna ainda ta bao di 70% di loke e tabata na 2019, y na menos di 75% di loke a registra aña pasa. Di otro banda, tanto impuesto di importacion como accijns y BBO/BAVP ta mustra mehoracion compara tanto cu 2019 como 2020. Pa tur tres e categorianan aki a registra un nivel cu ta mas di 100% di loke a recolecta na 2020, mientras cu e comparacion cu 2019 ta mustra un mehoracion relativamente chikito, cu BBO/BAVP na un nivel di alrededor di 90% di loke e tabata na 2019.

Entrada Total

En total entrada gubernamental a aumenta, aunke cu entrada total no a aumenta porcentualmente compara cu luna anterior. En cambio, entrada total di impuesto si a mehora, compara tanto cu 2019 como 2020. Esaki ta probablemente debi na e menor entrada di dividendo di e entidadnan estatal, cu tambe ta pasando den tempo mas dificil.

Mehoracion durante 2021?

E cifranan di e indicadornan cu nos a usa pa duna un impresion di crecemento economico na 2021, unda a compara e ultimo tres luna disponible (mei, juni, juli) cu e tres lunanan anterior (februari, maart, april), ta indica en berdad relativamente mas entrada durante e ultimo lunanan cu den e periodo anterior. Esaki ta conta pa tur indicador, aunke menos pa loonbelasting cu pa e demas. Ta destaca mas cu tur loke importacion di mercancia y otro producto a trece aden, producto di cierto animo pa e mehoracion den e clima economico, despues di terminacion di e medidanan relaciona cu Covid-19. Mester tuma na cuenta si cu ta trata aki di e periodo inmediatamente promer cu e inicio di e siguiente crisis di coronavirus, cu a conduci na aparicion di Aruba riba lista cora di CDC, cu e recomendacion na ciudadano Mericano pa no biaha pa Aruba. E efecto aki pa nos sector economico principal lo bay resulta den e proximo lunanan.