Caso Ibis no ta solamente riba Paul Croes; AVP : Sistema hudicial tambe tin cu wordo cuestiona pa tene un ciudadano rehen cuater aña largo

Un derecho basico den un sistema democratico, ta c’un ciudadano ta forma parti di un proceso hudicial, cu ta percura pa su derechonan wordo conserva y proteha pero na mes momento e ciudadano tambe tin e obligacion di respeta e proceso hudicial si e comete un of otro infraccion contra di e procedura hudicial.

Ayera mainta Corte Superior a trata e caso di apelacion den e caso conoci como Ibis di e politico Paul Croes kende for di luna di augustus di 2017, ta den e proceso aki, caminda a base di algun keho entrega pa rivalnan politico, Ministerio Publico a habri un investigacion cu a dura dos aña prome cu e caso a keda cla pa bin dilanti di mesa berde.

Un caso cu a conoce diferente cambio pa loke ta e acusacionnan y cu na final di cuenta a bin tene Paul responsabel pa motibo cu el a usa un suma di placa di su fundacion pa asuntonan cu no ta mucho cla pero ta algo cu ta pasa den e circulo politico cerca casi tur partido politico.

Na luna di februari di 2019 Corte a trata e caso caminda Hues a laga varios acusacion cay mientras cu e no a tuma na consideracion di Fiscal pa impone un suspension riba e politico caminda pa varios aña e no tabatin mag di eherce un funcion publico of forma parti di un gobierno.

Tur esaki a sosode despues cu Ministerio Publico y Hues Comisario a mantene Paul Croes mas cu 60 dia den prison pa despues e sinta na su cas sin por haci algo, sin por traha pa spera e caso bin dilanti casi dos aña despues.

Ministerio Publico a apela e caso y un biaha mas a manda e politico a wordo poni den un situacion caminda e mester a sinta warda, cu su bida realmente “on hold” mescos cu esun di su famia y sin cu e por a hiba un biba normal mescos cu tur hende ciudadano.

Awor practicamente algo mas cu dos aña despues, Paul Croes ta dilanti mesa berde atrobe, caminda el a caba di cumpli dia 21 di augustus, cuater aña di e pesadiya aki cu el a bin haya su mes aden y sin duda bou di ningun ley esaki ta aceptabel of tolerabel.

Ta un castigo formal esaki ta, un castigo cu tanto su persona como otronan cu a pasa for di e situacion dificil aki, ta keda libra di e angustia di biba tur dia, cu e pensamento c’un ora pa otro autoridadnan por drenta bo cas atrobe y spanta henter famia y bolbe bay cu e persona ya cu nan tin e autoridad aki pa haci tal.

Un hende cu a wordo deteni, cu a wordo laga liber, cu a pasa den un proceso penal caba, kende tin cuater aña cu su bida paralisa, sin duda a pasa den un castigo cu ta mucho mas pisa cu cualkier otro situacion c’un hende por haya su mes aden.

Den e caso contra di Paul Croes, tambe Ministerio Publico a acusa su persona cu e lo ta pertenece na un organisacion criminal un cargo cu nan a formula tambe contra di Otmar Oduber y Benny Sevinger pero den ningun di e tres casonan aki, Ministerio Publico a presenta e otro miembronan di e “organisacion criminal” nan aki cu nan ta papia di dje.

Awor un biaha mas Paul Croes tin cu pasa den un proceso angustioso cu por dura cuater dia largo, cu tin su persona yu henter su amia den un tension increibel pa algun dia atrobe mientras cu ainda despues di diahuebs ainda Paul y henter su famia tin cu bida den mas dia di tension sperando riba e decision cu Corter Superior lo tuma den e caso di apelacion aki.