Prome Minister Evelyn Wever-Croes, dunando update di Covid pa Aruba expresa cu e luna di Augustus tabata un luna duro pa Aruba pa cu Covid. Nos a conoce 2769 caso nobo durante di luna. Nos a cuminsa e lunana 546 caso activo y nos a yega tena 1076 caso active dia 18 di Augustus. Despues e la cuminsa baha bek y nos a cera luna na 590.

Lamentablemente, Prome Minister a remarca, den e luna aki nos a perde 36 persona cu a fayece cu Covid y esaki ta e cantidad di mas halto cu nos a maak mee durante henter e experiencia cu Covid. E cantidad di mas halto aña pasa tabata na September na unda cu 17 persona a fayece. Augustus tambe a conoce un peak di e crisis dia 20 ora cu a reunite marduga y mester a tuma medidanan hopi severo pa 10 dia.

Nos ta mira cu e medidanan aki a yuda ya cu di e fecha ey pa awor nos ta mira cu e averahe di casonan a baha considerablemente. E averahe tabata entre 90 y 100 caso pa dia pero awor despues di 10 dia e averahe di caso ta 55 pa 60 pa dia”, Prome Minister a duna di conoce.

Dia cu a tuma e decision pa cu e medidanan ta pa motibo cu tabata tin 83 persona den hospital y esey tabata un peak. Awor aki e presion a bahana 73 di cual 16 ta na Colombia. Algo bon ta tambe cu a logra amplia e capacidad di personal. Aruba a haña asistencia di Hulanda pa yuda nos personal y crea cama adicional den Cuido Intensivo pa asina por atende nos pashentnan.

E cifranan ta bahando bek na mesun nivel cu ora luna a cuminsa y e cantidad di casonan nobo pa dia tambe ta poco menos di loke a cuminsa pa luna. Esaki ta un indicacion cu e peak tabata den Augustus y awor nos ta bayendo den e mesun nivel cu prome di Augustus.

Prome Minister a duna di conoce cu e situacion na hospital ta keda preocupante pasobra te cu dia 31 di Augustus tabata tin 15 hende den Cuido Intensivo na Aruba y 16 den Cuido Intensivo na Colombia.

E dolor ta e 36 persona cu a fayece. Desde 1 di July e cantidad di personanan cu ta fayece, e gran mayoria no ta vacuna. Tambe nos a ripara cu esnan cu ta fayece cu no ta vacuna ta den edadnan mas jong tambe. Tin un grupo si cu a vacuna y a fayece pero nan edadnan ta mas halto. Esaki ta indica cu esnan cu a fayece y ta vacuna tin otro condicionnan di salud cu ta haci cu nan situacion ta mas delicado.

Pa loke ta vacunacion, nos ta mira cu den e luna di Augustus el a cuminsa slow pero a caba cu hopi mas hende a bay vacuna. E prome siman 186 persona so a bay vacuna, e di dos siman1096 persona a vacuna, e di tres siman 1040 y e siman cu tabata tin e vacunathon 2114 persona a vacuna y di cuater siman 1061 persona a vacuna. Esaki ta mustra cu pa e luna di Augustus den e ultimo tres simannan mas di 1000 persona cada siman tabata bin acerca pa vacuna. Nos a cera luna di Augustus cu un total di casi 5500 persona cu a vacuna.

Nos ta hopi agradecido pa cu esaki pasobra ta solamente si bo vacuna bo por tin proteccion. E grupo di 60 aña ta e grupo cu mas ta coopera y ta na 81% vacuna caba. Ainda nos no ta na 85%. Esunnan di 18-60 aña, 75.3% ta vacuna cual tambe ta hopi bon y edad entre 12 – 17 ta na 51.6%. Dus akinan nos tin hopi espacio di hendenan cu por bay vacuna. Akinan nos kier stimuli mayornan pa hiba nan yiunan vacuna.

Vacunacion no ta e proteccion y garantia pa tur cos pero si nos ta mira awor aki cu esnan vacuna ta esnan miho protehi di e efecto nan devastador di e pandemia aki.

Luna di Augustus tabata e luna mas pisa pa Aruba. Cu poder di Dios nos ta habri September cu lo ta un miho luna cu e vacunacion sigui subi y nos por logra cu mas hende vacuna pa mas hende ta protehi”, Prome Minister Evelyn Wever-Croes a duna di conoce.