Ayera den su resumen diario riba desaroyonan di pandemia di Covid-19 na Aruba, Departamento di Salubridad Publico DVG a informa e lamentable noticia cu dos ciudadano mas a fayece cu Covid-19.
Ambos fayecido tabata residente di Aruba.
DVG a informa cu for di comienso di juli, tempo cu e variante Delta di e coronavirus SARS-CoV-2 a haci su introduccion na Aruba, por observa cu lamentablemente 40 persona a perde e bataya contra e virus di Covid-19. Di esakinan, 6 tabata vacuna y 34 no tabata vacuna. Riba e graficonan adhunto por observa e cantidad di fayecido y un averahe di nan edad.
Den otro informacion relaciona cu pandemia di Covid-19 cu DVG a divulga ayera, a constata cu 96 persona a recupera y a registra un total di 57 caso nobo di e malesa, di cual 8 no ta residente y 49 ta residente. E cifranan aki ta representa un tasa di positividad entre nos residentenan di 20 porciento.
E cantidad di caso activo ayera tabata 587. Datonan ta ilustra casonan nobo di Covid cu un averhae semanal di 57 caso pa dia, y un averahe di tasa di positividad semanal di 24 porciento pa dia.
Actualmente tin 52 persona interna den hospital debi na Covid-19. Di esakinan, 15 ta den Unidad di Cuido Intensivo ICU, y 37 riba piso general. Na Colombia tin actualmente 16 pashent di Aruba interna den ICU.
