SKOA ta confia cu gobierno nobo lo trece un solucion pa werksternan

Director di SKOA ayera atardi a duna un conferencia di prensa pa trece dilanti informacion tocante situacion di trahadonan di limpiesa y cu te momento nan aki nan no a papia cu minister demisionario di enseñansa, Armando Rudy Lampe, pa motibo cu un proceso cu un mediador ta tumando luga.

Habrimento di scol cu a wordo posponi pa un dia door di e situacion cu trahadonan di limpiesa di e 46 scol cu ta conforma SKOA tin na e momentonan aki, di esaki Baly a menciona cu diaranson ultimo nan a delibera cu diferente persona y un di nan tabata e mediador cu for di januari ta den e comision hunto cu sindicato Seppa y tambe cu un representante di minister di Labor na unda cu a wordo entrega un proposicion di kico mester haci pa resolve e problema di trahadonan di limpiesa di SKOA.

Manera el a informa, e proposicion aki a wordo entrega dia 3 di juni , despues nan a sinta cu prome minister demisionario Evelyn Wever-Croes dia 30 di juni caminda cu el a pidi pa nan espacio y tempo pa wak otro proposicion cu tin na unda cu SKOA a duna e espacio pero cu mester tene na cuenta cu formacion di gobierno ta tumando mas tempo di loke tabata espera.

Den e puntonan cu nan a papia den e reunion aki segun Baly a enfatisa nan no a trece dilanti e situacion di trahadonan di limpiesa, pa motibo cu e tempo tabata cortico, pero esey no a kita cu e punto cu ta esencial pa nan ta e parti di limpiesa.

Na e momentonan aki, nan ta den proceso di deliberacion y dialogo ta habri segun Baly a informa, na unda cu nan tin e mediador hunto cu nan pero tambe tin parlamentarionan cu ta bezig cu ta haci cierto preguntanan pa nan wak con por bin cu un solucion lo mas lihe posibel pa asina scolnan por keda habri.

“Esey tambe ta nos meta di SKOA pa muchanan cu tabata contento di bay pa scol y juffrouwnan sigur tambe tabata hopi feliz” Baly a declara.

Pa SKOA salud mental di muchanan ta importante, pero salud tambe ora muchanan ta na scol cu e luga ta higienico tambe ta importante, el a sigura cu esey a wordo resolvi manera nan por haciel’e, ademas el a indica cu tabatin caminda na unda no tabatin trahado di limpiesa y nan mester a haci algun ahustacion pa nan por traha aunke e presupuesto ta limita, “e ta dificil pasobra ora bo tin un scol grandi cu tin dos of tres werkster, aworaki tin sea un of dos”.

Asina mes, el a bisa cu un solucion ta na caminda manera gobierno nobo lo forma y minister nobo di Enseñansa tambe lo sinta pa tuma decisionnan concreto y pa wak con nan lo sigui den e lucha aki pa cu e trahadonan di limpiesa, ademas el a comenta cu nan tin hopi fe cu gobierno nobo lo cumpli cu nan.

Di loke ta trata e decision di no habri scolnan diaranson ultimo cu a causa cierto reaccion den comunidad, Baly a trece dilanti cu nan a haci un reunion cu directornan y scol leaders na unda cu por a compronde cu mayornan tabata “hopi comprensivo” di e situacion, pasobra nan tambe sa kico ta e situacion y cu nan tambe sa cu ta pa e bienestar di nan yiu na unda cu scol mester ta limpi.

Baly a splica cu desde cu pandemia di Covid-19 a yega na luna di maart di 2020 na Aruba, scolnan a cera y nan a habri par di luna despues na unda cu tur cos tabata inplace, “nos di parti di SKOA hunto cu nos docentenan y cabesantenan semper tabata habri bou di circunstancianan, aunke no tur cos tabata in place pa lo cual tabata nos trahado di limpiesa”, el a bisa.

Tambe Baly a bisa cu nan a duna di conoce mediante un carta di dia 13 di augustus ultimo e posibilidadnan cu tabatin pa habrimento di scol y no cu tabata un decision un dia prome cu 1 di september manera algun hende a informa, Baly a afirma cu nan a papia cu nan trahadonan di limpiesa y sindicato Seppa cu tambe involucra na unda cu nan a entrega cerca SKOA e peticion pa trahadonan limpiesa keda, esunnan cu a scoge pa keda, manera el a sigura pa motibo cu esaki ta un opcion personal.

“Tur cos ta tuma tempo, ainda ta bezig cu formacion y tur hende ta druk pero, nos a pone tur hende na haltura”, Baly a indica.

SKOA no tabatin contacto cu obispo riba e asunto aki segun Baly a expresa, pa motibo cu nan ta pone nan vicarionan na haltura riba cualkier situacion y decision cu SKOA ta tuma y na su luga e ta informa obispo, den caso aki ora ta tuma decision pa cera scol no ta pa tuma contacto cu obispo, pero den otro casonan nan ta dunel’e tur informacion.

Di loke ta trata comunicacion cu minister demisionario di Enseñansa Armando Rudy Lampe, Baly a manifesta cu den e tempo aki nan no tabatin contacto cune, “nos no tin ningun problema pa sinta cu minister Lampe na mesa pero, a instala un comision na januari di mediador pa tuma un decision, si ya caba a instala un comision cu mediador nos ta sigui riba e mesun rumbo ey, pero tampoco lo compronde robes cu esey lo por pasa”, el a expresa.

Bon Dia Aruba a tuma contacto cu minister Lampe na unda cu el a sigura cu den dianan aki e lo duna un declaracion.

Igualmente Baly a afirma cu obispo a pidi pa henter directiva entrega nan retiro, “esey ta un hecho cu ta andando y mi no kier bay mucho den dje pasobra tin un Raad van Toezitch y esey ta un hecho cu berdad e ta andando”, y cu den esaki tin un dialogo cu ta andando, Baly a finalisa.