Ayera tabata un dia basta spera, no solamente pa muchanan, sino tambe pa mayornan y docentenan. Aña escolar nobo a cuminsa cu hopi alegria na unda cu docentenan y cabesante di scol tabata wardando esunnan mas chikito hasta esunnan mas grandi pa duna un bonbini caluroso.
Despues di varios siman di preparacion na unda cu algun scolnan a bira mas bunita pa muchanan por sinti nan mes confortabel, pero cu tambe tabatin cierto incertidumbre cune, finalmente dia di cuminsamento di scol a yega.
Tocante esaki, SKOA a trece dilanti cu nan a haci bishita na algun scol e dia di ayera, caminda por a mira muchanan sumamente contento como tambe docentenan cu tambe tabata contento cu scol por a habri; ademas di protocol y reglamento pa loke ta trata higiena y proteccion contra Covid-19.
“Algo cu ta necesario pa por funciona den nos scolnan”, asina a declara director di SKOA, Anuesca Baly durante un conferencia e dia di ayera.
Manera ta conoci, casonan di Covid-19 ta sigui aumenta y scolnan a implementa cierto reglanan na unda cu den e prome dia scol por mira esakinan riba e borchi na entrada di scol mes, indicando loke mester haci pa cumpli cu nan. Un ehemplo di esaki ta cu un mayor so por drenta cu su yiu na scol den oranan di mainta ora scol ta cuminsa pa alumnonan di kleuter.
Igualmente nan cu ta esunnan mas chikito tambe a presenta cu tapaboca di diferente color pa asina cuminsa un etapa nobo di experiencia y aprendisahe. Ekipo di Bon Dia Aruba ta desea tur mucha exito den aña escolar nobo 2021-2022.
