Na aña 2002 a renoba gran parti di e Codigo Civil di Aruba, conoci na Hulandes como e ‘Burgerlijk Wetboek van Aruba’ (BWA). E tempo ey a scoge pa laga algun topico y temanan specifico pendiente. Na aña 2016 a aproba e Ordenansa (‘Landsverordening’) pa caba di actualisa e Codigo Civil (AB 2016 no. 51).

Ta trata aki di e adaptacionnan den e leynan di persona y famia (‘Buki 1’), ley di propiedad (‘Buki 3’), ley di herencia (‘Buki 4’) y e leynan cu ta regarda acuerdonan special (Buki 7). Buki 5, ley di derechonan pa cu derechonan estableci riba propiedad y inmueble, y Buki 6, ley di contrato, tambe a conoce cierto cambionan. Sinembargo pa por a laga dicho Ordenansa drenta na vigor mester a reglamenta cambionan den varios ley y introduci reglanan di transicion. Esey a tuma luga pa medio di Ordenansa di 8 di maart 2021 (AB 2021 no. 43).

Ta bon pa menciona cu entretanto e Ordenansa pa introduccion di e ‘Buki 2’, relaciona cu stipulacion di entidadnan legal tambe a drenta na vigor na januari 2021. Pues por bisa awor, segun un comunicado di gobierno, cu despues di tur adaptacion y aprobacion di Parlamento, cu henter nos Codigo Civil di Aruba ta completamente modernisa!

Mester menciona cu varios adaptacionnan haci den e Codigo Civil, ta cambionan tecnico y di terminologia relaciona cu introduccion di e cambionan riba nan mes. Hopi biaha ta e titulonan of stipulacionnan a adapta of cambia y uza otro nomber y/of palabra.

En todo caso e cambionan principal ta den Buki 1:

Cambio den escogencia di fam ora un yiu nace of bira mayor di edad. Ora e nace ta e mayornan y despues ora e bira mayor di edad e mes por haci cambio na su fam.

A revisa e regimen di derecho di propiedad matrimonial;

A introduci determinacion hudicial di paternidad;

A revisa e acuerdonan di custodia comparti despues di divorcio;

A adapta e leynan rond di “geregistreerd partnerschap” (‘union civil’).

Den Buki 4:

A determina e leynan nobo di herencia.

Den Buki 7:

Revision di acuerdonan special referente huur y leynan di contrato laboral.

Den e dianan y simannan nos dilanti lo dedica atencion na cada un di e cambionan aki separa, pa informa nos Comunidad di tur e cambionan den e Codigo Civil.