(AP) — China ta prohibiendo muchanan di hunga weganan online pa mas cu tres ora pa siman, e restriccion mas fuerte imponi te awo riba industria di gaming, mientras reguladornan Chines ta continua nan campaña contra sector di tecnologia.
Menornan di edad na China por hunga wega solamente entre 8pm y 9pm riba diabierna, weekend y dianan festivo publico cuminsando for di dia 1 di september, segun un aviso di Administracion Nacional di Prensa y Publicacion.
Esey ta limita gaming na tres ora pa siman pa mayoria di siman riba kalender, un reduccion mas cu e restriccion poni na 2019, cu tabata permiti menornan di edad hunga wega pa un ora y mey pa dia y tres ora riba dianan festivo publico.
E regulacion nobo ta afecta algun di e companianan tecnologico mas grandi di China, incluyendo gigante di gaming Tencent, cual su wega multiplayer online, Honor of Kings ta extremadamente popular mundialmente, como tambe compania di gaminga NetEase.
Prijs di accion di Tencent a cera 0.6% abao na 456.80 dollar di Hong Kong riba dialuna prome cu e anuncio di e regulador. Su capitalisacion di mercado di $573 biyon a cay mas di $300 biyon for di su peak na februari, un reduccion igual na mas cu e balor total di Nike Inc. of Pfizer Inc.
Accionnan di NetEase lista na New York a cay alrededor di 9 porciento den apertura di e mercado.
E restriccionnan riba gaming ta parti di un accion andando riba companianan tecnologico memey di preocupacion cu companianan di tecnologia – hopi di cual ta provee servicio di mensahe ubicuo, pago, y gaming – por tin un influencia demasiado grandi riba sociedad.
Anteriormente e luna aki, Tencent a bisa cu ta bay limita tempo di gaming pa menornan di edad na un ora pa dia y dos ora durante dianan festivo, como tambe prohibi muchanan bao edad di 12 aña haci compra den e wega.
E compania a pone e limitenan algun ora despues cu un corant afilia na estado a critica a industria di gaming y a yama e weganan ‘opium spiritual’.
Reguladornan a bisa den e aviso ayera cu nan ta bay reforsa supervision y aumenta e frecuencia di inspeccionnan di companianan di weganan online pa sigura cu nan ta cumpli di cerca cu e regulacionnan.
Autoridadnan Chines den lunanan recien a enfoca riba educacion online y comercio cibernetico, y a implementa regulacionnan nobo pa combati comportamento anti-competitivo despues di añanan di crecemento rapido den sector di tecnologia.
Luna pasa, autoridadnan a prohibi companianan cu ta duna tutelahe den materianan central (kerntaken) na scol di genera ganashi, eliminando biyones den balor di mercado pa companianan di educacion online manera TAL Education y Gaotu Techedu.
