Den e edicion di awe un articulo extenso riba e cambionan desea y necesario den Contraloria General (Algemene Rekenkamer Aruba; ARA) pa nan por haci nan trabao debidamente, segun e normanan acepta internacionalmente. Esaki no ta un asunto nobo y talvez lo bolbe na nos atencion varios biaha promer cu algo lo bay sucede efectivamente. Lo por puntra ta pakico nos ta cuminza cu semehante pesimismo tocante loke por logra na mehoracion den e asunto aki, y esunnan similar, pero esnan cu conoce e practica den ultimo decadanan, lo duna nos razon. Sin embargo, nos ta comenta e asunto aki, hustamente pa duna un advertencia na nos politiconan nobo, cu ta bira tempo pa cuminza actua den e asunto aki y yuda crea un ambiente propicio di control financiero den gobernacion, algo dificil pasobra ta pidi politico pa crea algo cu ta limita nan espacio di actua libremente. Sin embargo, si no ta hacie, anto no mester papia mes di bon gobernacion.
Den e relato di e entidadtin dos punto importante cu por señala cerca otro instancia cu mester eherce control. Uno ta legislacion deficiente, sin suficiente autonomia pa e entidad. Un aspectodi falta di autonomia ta e relacion complica cu Contraloria tin cu Parlamento. Riba su mes no ta problema cu e entidad ta raporta na Staten, cu ta discuti e rapport(nan), y ta tuma decision kico ta haci cu recomendacion di indole general. Si esakinan no ta di agrado di e mayoria gubernamental, ta te ey nan a yega tambe. Pero esey ta bida, Parlamento tin e privilegio di dicidi si ta haci algo cu e recomendacionnan. Otro cos ta e problema grandi cu, si Contraloria detecta hecho castigable den su trabao di auditoria, nan mester tin, segun nos opinion, e libertad di atende e asunto directamente cu autoridadnan hudicial. Y esey, atrobe segun nos opinion, no ta posible den e actual cuadro legal dentro di cual e entidad mester opera. Berdad ta tambe cu e problemanan segun nos ta mas na nivel di e ley cu ta regarda Rekenkamer, ya cu den Constitucion (Art. IV.7) ta stipula cu forma organizativo y autoridad di Rekenkamer ta ser regla via ley (landsverordening). Esaki ta implica cu e actual ruta via Staten tambe pa caso di indole penal por keda cambia den ley pa un autorizacion pa bay directamente cerca autoridadnan hudicial. Mientras cu por tin hende cu ta haya ta bon pa regla e asunto aki asina, unda semper e mayoria gubernamental tin ultimo palabra, nos ta di opinion cu esey no ta bon, Imagina: cu Rekenkamer tin menos derecho cu un simple ambtenaar cu ta detecta algo castigable den su area di trabao y por/mester hasta, segun LMA, haci denuncia, y un organo di control halto ta cana dal nan cara den e mayoria gubernamental, cu mas tanto no kier mira nada contra ‘nos hendenan’.
E otro punto ta cu reclutacion di personal ta pasa necesariamente via gobierno y ta resulta un obstaculo grandi pa por tin e personal adecuado. Aki ta surgi tambe e aspecto di nivel di salario cu ta atractivo pa por contrata e cuadronan necesario. Nos ta papia explicitamente aki di ‘cuadro’ pasobra ta trata di persona altamente califica, cu no ta haya sin mas localmente. Tambe e trayecto largo di nombramento via gobierno y e aparente desinteres di pone e tipo di entidad aki como prioridad ta haci cu hopi biaha e persona interesa ya a move pa otro oportunidad caba. Si no ta bin un cambio den esaki, y aki nos ta papia tambe di e otro entidad o servicionan cu mester mas autonomia, tambe pa recluta nan personal, nos no ta haciendo nada mas cu scucha cada tanto tempo e gritonan di ‘integridad’ y ‘transparencia’ pero e berdad ta cu den practica nada ta cambia. E situacion dificil di Rekenkamer di falta di personal adecuado ta conta tambe pa años caba pa Accountantsdienst, cu ta lidiando cu menos di mitar di e personal cu nan tabatin 20 aña pasa…, mientras cu gobernacion a crece.
Y si no ta bin cambio den e asuntonan aki, no lo tin speranza tampoco cu e entidadnan cu mester crea nan aparato ainda, lo haya e recursonan cu nan mester. Pa menciona algun: nos tin e caso di e Ombudsman, pa cual a logra pasa e ley, pero ta dificil imagina cu den e tempo di crisis aki lo tin fondo apropia pa establece un oficina adecuado. Mescos ta conta tambe pa e aparato di control cu segun ley Conseho Electoral lo mester haya pa controla asunto financiero di partido politico. Nos ta ripiti aki nos critica di pone responsabilidad di controla finanzas di partido politico den man di un organo electoral, cu no tin ni un secretario, te pa nan tin un auditoria di nan mes pa haci e trabao debidamente. Ta parce mas bien un sabotahe abierto di e partidonan politico cu a vota na fabor di e monster aki, convenientemente creando un tiger di papel, o un watchdog sin diente.
E cambio mas importante cu mester bin den e asuntonan aki, ta un cambio di mentalidad. Tanten gobierno y politiconan ta haci esfuerzo pa minimaliza control riba nan mes, nos ta keda scucha lema bunita, pero di cambio berdadero, nos lo no mira nada. A menos cu ‘nan’bin hacie pa nos?
