Clifford Rosa, Stichting Rancho: “Nos a pidi pa nan colaboracion pa locual cu nos ta bin ta haciendo, vooral den e proyecto di celebrando 200 aña di Oranjestad”

Dialuna atardi director di Stichting Rancho, Sr. Clifford Rosa tabatin reunion cu formador di gobierno, Minister President demisionario Sra. Evelyn Wever-Croes y durante e reunion aki Sr. Rosa a trece pa dilanti diferente punto di importancia cu Stichting Rancho tin.

Dia 20 di april di aña 2020 Stichting Rancho a inicia e programa celebrando 200 aña di Oranjestad y Sr. Rosa ta bisa cu e motibo pakico e programa aki di celebrando 200 aña di Oranjestad ta importante ta pa conscientisa y educa e comunidad di Aruba pa loke ta trata e materianan di herencia di nos isla.

Den e mesun terminologia Sr. Rosa ta splica cu un di puntonan mas importante pa Stichting Rancho ta colaboracion di parti di gobierno. “Nos a pidi pa nan colaboracion pa locual cu nos ta bin ta haciendo, vooral den e proyecto di celebrando 200 aña di Oranjetsad cu ta un proyecto di 2020 pa 2024”, Sr. Rosa a bisa. “E punto di enfoke ta pa educa nos comunidad local y no local ariba nos herencia cultural, comercial, desaroyonan urbano, tur locual cu tin di haber cu e desaroyo di un capital segun ROV y ROPV”.

Sr. Rosa a bisa tambe cu den e cuadro di colaboracion di parti di gobierno, nan ta pidi proteccion pa e capital di Aruba. “Nos ta pidi e ora pa tin un proteccion, un maneho un tiki mas riba nivel di Unesco, Sister Cities, den e contexto ey pa ta facil pa nan compronde den liña grandi, paso ta papia riba liñanan grandi y di nos banda nos ta trahando caba y nos kier a comparti un rato cu e formador tocante kico nos ta desea di mira di nan banda den colaboracion como gobierno ta eigenlijk ta pa proteha nos area di Oranjestad”, el a splica.

Stichting Rancho tin un palabracion cu ministerio di enseñansa, ciencia y sostenibilidad y locual nan ta desea, ora cu gobierno sinta ta pa reforsa e cooperacion ey pa asina nan por sigui funciona, bou di e colaboracion hunto cu gobierno.

Siman pasa Stichting Rancho, den trayectoria di e programa celebrando 200 aña di Oranjestad, a firma un acuerdo cu e organisacion OASCA di Merca. Sr. Rosa ta splica; “E organisacion OASCA, e ta un organisacion na Merca, Arubianonan cu a atende cu e sister city agreement cu Merca tin cu Aruba, entre Doral y Oranjestad, y nos punto di enfoke ta bay ta eigenlijk e sister city agreement entre Oranjestad y Boston y hunto crea un intercambio cultural y comercial entre e Oranjestad y Boston”.

“Eigenlijk e gobierno di Aruba tin un acuerdo cu e organisacion aki y e ora nos como NGO, e prome NGO mi ta kere cu a cera acuerdo cu nan pa asina encamina e proyecto di celebrando 200 aña di Oranjestad. Ya mirando e sister city agreement cu Doral ya ta un paso, dus di nos banda nos ta mira Boston como e potencial pa nos como ciudad of como bario Rancho, pa asina nos intercambio informacion cultural, historico”, Sr. Rosa a splica.

E ta bisa tambe cu ya tin otro ciudadnan cu ta den proceso tambe cu a wordo menciona door di OASCA, y e ta splica cu “Stichting Rancho ta bay duna sosten na e tematica celebrando 200 aña di Oranjestad mirando cu hopi di nos Arubianonan of hendenan cu ta atende cu Aruba internacionalmente no a para keto na e edad di Oranjestad y den e caso ey nos ta bay educa nos Arubianonan bibando afo di Aruba”.