Ayera oficialmente a cuminsa e tratamento di e ‘Caso Ibis’ na Corte di Apelacion na unda cu Ministerio Publico a trece dilanti cu den dianan aki te cu diahuebs awor 2 di september tres hues di e Corte di Apelacion lo bay trata e caso di seis sospechoso.

Fiscal di Ministerio Publico Patrick van der Biezen a combersa cu prensa ayera den oranan di mainta y a conta cu e caso aki tin un planning traha pa e dianan cu ta bin dilanti, den HOF tabata esun di ayera na unda e feiten behandeling cu ta trata di contenido, a tuma luga y probablemente lo por extende te awe mainta.

Feiten behandeling tin di haber cu hues ta cuminsa trata e hechonan, na unda e ta repasa e dossier completo cu e sospechosonan y por haci pregunta, e abogado general representante di Ministerio Publico tambe por haci pregunta na e sospechosonan, el a sigura cu tambe den algun momento lo bay tin e tratamento di circunstancia personal caminda cu lo papia di esaki cu e sospechosonan y un bes cu esey ta casi cla, e representante di Ministerio Publico lo cuminsa cu e requisitoir cu posiblemente ta awe mes.

Awe den oranan di merdia e representante di Ministerio Publico, e abogado general lo bay cuminsa cu su requisitoir unda cu lo mester trece puntonan di bista di Ministerio Publico dilanti den tur e casonan.

Mañan diaranson e defensa lo haya oportunidad pa trece e argumentonan dilanti di nan clientenan y diahuebs lo trata e repliek y dupliek.

Van der Biezen a sigura cu te ainda nan no sa si diahuebs e caso ta wordo cera door di HOF, pero si esey lo pasa ta nifica cu despues den tres siman of no mas tarda cu 21 dia, manera el a sigura, e caso lo wordo cera y lo bay tin un sentencia.

Den caso specifico di e sospechoso principal ex-minister Paul Croes, van der Biezen a declara cu e motibonan cu Ministerio Publico a apela contra e caso ta pa motibo cu Croes a wordo vrijgesproken parcialmente di cierto hechonan, y e dos di nan a wordo vrijgesproken na unda cu Ministerio Publico ta haya cu tin suficiente pruebanan di esey tambe.

“E dos fiscal di Ministerio Publico cu a atende e caso na Prome Instancia a pidi pa kita passief kiesrecht pa un tempo maximo, e no por participa como candidato riba un lista di partido politico y cu hues no a bisa nada over di esey, pa e motibo ey tambe Ministerio Publico a apela”, el a agrega.

Van der Biezen no a bay mucho den detaye pa motibo cu e caso ta wordo trata den dianan aki pero el a afirma cu ta bay den e parti di preguntanan huridico, na unda lo haya sa si tabatin regalo a cambio di ontheffing of no pa dos delito specifico, den esaki hues a bisa cu e ta haya cu no, pero Ministerio Publico ta haya cu si, segun van der Biezen a comenta y esey tin cu wordo trata aworaki di nobo.

Tocante e tempo cu Croes a pasa den KIA cu ta 86 dia den cual abogado di Croes a indica cu e derechonan di dje a wordo viola, van der Biezen a splica cu ta un argumento cu a wordo treci dilanti y lo wordo trata, “ta un hecho cu sr Croes a pasa hopi dia den beperking, esey ta un medida cu a wordo getoets door di e hues comisario y e no a hayel’e cu ta contra ley na e momento ey y aworaki e tres hues lo bay na analisa atrobe tocante e pregunta ey y nos lo wak’e si e ta legal si of no, of si e ta bay hunga un rol pa loke ta trata e sentencia of e castigo”.

Den caso aki no tin algun hecho nobo manera van der Biezen a sigura, e mesun caso ta wordo trata y e mesun ponencianan lo wordo treci dilanti, di e seis sospechoso di e caso Ibis, el a afirma cu dos sospechoso hunto cu Ministerio Publico a apela, loke ta nifica cu tur dos partido no tabata di acuerdo cu e sentencia, Ministerio Publico a apela e sentencia di tres sospechoso y un di nan a bay apelacion su so.

Tocante e pregunta cu Bon Dia Aruba a haci pa van der Biezen tocante si ta bay tin un ontnemingszaak contra Paul Croes y Mellony Paesch el a afirma cu si, dia 28 di october ta cuminsa e tratamento di esey den Prome Instancia.

Bon Dia Aruba tabata presente na Piedra Plat Entertainment Center na unda cu Corte a dispone di e luga aki pa esunnan interesa pa sigui e caso, pa motibo di pandemia no tabatin publico den sala di corte sino famia di e acusadonan so.

Loke por a ripara ta cu tres hues tabata hopi skerpi y nan a enfrenta e sospechoso principal den caso aki cu ta Paul Croes cu un cantidad hopi grandi di tapgesprek contra su persona unda ayera e mester a defende su mes di 4 di e 6 delito, e delitonan ta: a comete den conhunto (delito di) pidi y acepta soborno, abuso di su funcion, comete den conhunto sustraccion (verduistering),  comete den conhunto labamento di placa regularmente,  comete den conhunto duna empleo ilegal y participacion na un organisacion criminal eherciendo como minister den Gabinete Mike Eman 2 cu un castigo di cuatro aña di prizon y e no mag di eherce ningun funcion publico pa un periodo di nuebe aña.

Awe e tin cu sigui defende su mes riba e delito di labamento di placa regularmente y participacion na un organisacion criminal, por a wak un Paul Croes cu na prome instante a kibra y yora cu no por a contene su mes di emocion.

Na mesun momento, Corte di Apelacion a cuminsa trata e hechonan di e sospechosonan Jairo Wever na unda cu den Corte di Prome Instancia el a wordo condena pa paga 5 mil florin y dos aña di prueba, Robio Di Vecchia a haya vrijspraak pero Ministerio Publico a apela ademas di Rudmilla Yvonne Martinus cu den Prome Instancia a haya vrijspraak y tambe Ministerio Publico a apela.