(El Tiempo) – Comandante di Polis Metropolitano di Cucuta, general Oscar Antonio Moreno Miranda, a confirma cu ayera dialuna 6or y mey di mainta a registra un atentado terorista contra stacion di e institucion cu ta ubica na Atalaya, districto 1.
“Criminalnan a laga un artefacto explosivo improvisa bou un stoel di e mobiliario urbano”, e oficial a sigura.
E comandante di e Polis na capital di Norte di Santander a resalta cu e explosion a tuma luga na momento di cambio di turno.
“Nos tin dañonan na e parti fisico di nos instalacionnan. Igualmente, e personal cu tabata sali y cu tabata drenta pa e cambio di turno, den e jornada laboral, tambe a wordo afecta pa via di e zonido di e explosion,” e oficial a señala.
Ta 12 e oficial afecta y dos civil cu tabata pasa cerca di e luga esunnan cu ta wordo atendi na hospital Erasmo Meoz.
Na e luga a yega organismonan di salud, cu a revisa e personanan herido y un grupo di bombero, cu ta evalua e dañonan structural.
General Moreno a señala cu tin un material cu a wordo recauda pa inteligencia pa asina haya claridad tocante e atentado, “nan lo wordo captura y presenta pa autoridadnan”, el a afirma.
“Na e momentonan aki, no por señala ningun grupo den e margen di ley, loke ta claro ta cu a lansa alertanan trempan riba e situacion di orden publico no solamente na Cucuta, sino na Norte di Santander”, un fuente a señala.
