E splicacion di lidernan di MEP y Raiz riba e reparticion di carteranan y responsabilidadnan den e siguiente Gobernacion no ta mucho cla pa lider di MAS, miembro di oposicion drs. Marisol Lopez Tromp. Particularmente e hecho cu a yega na 8 Minister, algo cu Prome Minister Evelyn Wever Croes a bis’e personalmente cu no ta necesario.

“Con ta hustifica cu ta nombra 8 Minister den un periodo di austeridad, cu ta pidi hende sacrifica parti di nan salario,” Lopez Tromp a bisa Bon Dia Aruba. “Aña pasa, Prome Minister Wever Croes a bisa mi directamente cu no tin mester di 8 Minister. E Gabinete ey tabata traha cu tres partido. Awor ta dos partido y toch ta amplia e cantidad di Minister.”

Mas Minister pa acomoda partido

E lider di fraccion di MAS a sigui bisa cu den su concepto no tin necesidad di 8 Minister, mirando tur medidanan cu ta tuma, cu reduccion di salario y beneficionan di tur empleado publico y tur hende. Pakico mester bay na 8 di Minister. E no ta algo normal pa acepta, pasobra tin hasta un partner di gobernacion menos. Mi ta wak e como un forma pa MEP acomoda su hendenan, pasobra nan por a wanta e cantidad di Minister na cuater of maximo cinco pa MEP, unda lo por a hinca e carteranan cu por combina cu otro. “E ta increibel,” Lopez Tromp a continua. “Tempo cu nan a baha mi, Evelyn Wever Croes a bisa mi cu nan no mester di 8 Minister y nan ta cumpli cu e locual hende tabata kier, esta di mantene e cantidad di Minister na 7. Particularmente pasobra e tempo ey ya caba a cuminza cu e condicionnan di e landspakketnan. Dus e ta straño. Pakico?”

E Parlamentario a enfatisa cu e pregunta ta na su lugar particularmente pasobra tin hende di Hulanda cu ta bin yuda y practicamente tin algun area di maneho cu ta Hulanda ta bay dicidi. “Pakico mester di 8 Minister anto? Djis pa acomoda hende?”

Reparticion cartera

Pa loke ta e carteranan, e Parlamentario y ex Minister kier mira cua departamento ta bay cay bao cua cartera. Pasobra locual a publica ta un capitulo principal, pero no ta mira exactamente cua departamento ta bay cay bao cua Ministerio. “Por mira Husticia y asumi cu tur e departamentonan ta keda mescos. Pero e por ta tambe cu a saca algun departamento di Husticia y pon’e bao otro cartera. Un ehempel ta un Voogdijraad. E por cay tanto bao Husticia of Departamento pa Asuntonan Social,” Lopez Tromp a splica. “Bao ken a pone tur e departamentonan cu tabata cay bao Infrastructura, manera un DTI. E ta keda bao Infrastructura? “

E pregunta aki segun Marisol Lopez Tromp mirando cu a duna RAIZ e responsabilidad di Cuido di Hende Grandi. “A piki Cuido di Grandinan for di e cartera di Salud of cartera di Asuntonan Social. El a keda su so. Ta mescos cu tin un cartera Hubentud, of pa Hendenan so. Y kico un cartera asina aki por haci sin e otro departamentonan. E ta nifica cu SABA ta cay bao RAIZ, anto Asuntonan Social ta cay pa MEP y e parti di Salubridad tambe ta pa MEP? Tur e aspectonan aki di Cuido di Grandi ta bay hunto.”

LIM

E reparticion segun un LIM nobo, esta e Landsverordening Instelling Ministers ta crucial pasobra awor aki ta unicamente mira e categorianan principal, “pero nan por pluma un Ministerio tambe. Nos a wak esey den pasado,unda a saca e problematica di Hubentud for di Asuntonan Social. Y awor a saca Cuido di Grandi. No laga ningun hende bisa cu di e forma aki ta duna e tema mas atencion. Esey ta nonsense, pasobra por dun’e atencion den su forma integral hunto cu e otro departamentonan cu e ta relaciona cune, den un cartera completo. Ta mescos cu ta parti Medio ambiente y Naturalesa y ta pone e diferente instrumento/ departamento cu tin di haber cu e tema, bao diferente Minister cu ta dificulta e cooperacion y ta stroba un maneho integral. Ami ta papia di practica,” ta e observacion di Marisol Lopez Tromp.

Accion21

Miguel Mansur tampoco ta compronde e necesidad pa 8 Minister. “Un Minister, den e caso aki Prome Minister Wever Croes cu un super pakete y ainda mester di 8 Minister no tin sentido y ta un abuso pa pueblo,” lider di Accion21 a bisa Bon Dia Aruba. “Ami a kere cu e tabata un joke ora cu e dos lidernan, di MEP y Raiz a bin dilanti,” tabata e comentario di lider di Accion21. “Por ehempel, e cartera di Economia sin Turismo ta ridiculo.”

RAIZ den concepto di Mansur a tuma un pakete di encargo cu hopi a describi como ‘pretpakket.’ “E ta mescos cu ta MEP so a gana y ta forma Gobierno,” ta e conclusion di Accion21.