Rainbow Warriors Core Foundation durante un conferencia di prensa despues di reunion cu formado, a trece dilanti cierto temanan cu nan ta considera hopi urgente pa atende na e momentonan aki como por ehemplo, innovacion den departamentonan, situacion ambiental y desaroyo economico.

Milton Ponson representante di e fundacion a expresa cu diabierna ultimo den un reunion cu Wever-Croes pa loke ta trata formacion di e proximo gobierno, nan a papia tocante temanan di urgencia di Aruba usando e structura di Nacionnan Uni pa islanan chikito, metanan di desaroyo sostenibel (SDG) y ‘Samoa Pathway’ un rapport di aña 2014 na unda ta indica con pa atende cu problemanan cu por wordo haya den islanan chikito.

Ponson a informa cu nan a papia extenso tocante temanan ambiental, algun temanan economico manera e necesidad pa diversifica, loke nan a constata cu den mercadonan laboral y derecho laboral hopi luga a keda mes cos, pero den e mayoria di e ramo economico a bay atras.

Tambe el a menciona cu nan a trece dilanti e tema di problemanan social siguiendo un modelo di National Health Services cu na Inglatera a wordo implementa di manera forsa door di Covid-19 y “nos ta kere cu hopi problemanan den Social Crisis Plan lo bay purba di atende di un forma nobo, implementando tecnologianan nobo pa atende nan clientenan”.

Ponson a conta cu National Health Services ta duna servicio 24 ora pa dia pa asina atende problemanan social, di indole domestico y otro temanan cu ta cay bao departamento social y di ayudo psicologico, of fundacionnan specialisa.

“Mi ta kere cu aki na Aruba mirando cu nos tin un penetracion halto di sistemanan digitalisa y cu practicamente tur hende tin telefon inteligente, ta opcion pa den futuro den contexto di Social Crisis Plan hopi cos por wordo ofreci via telefon tambe y lo ta un ampliacion di loke nos ta ofreciendo aworaki, pero e tin e beneficio adicional tambe cu por haci cos digital y por genera datonan, y en bes di core tras di hechonan por anticipa cierto desaroyonan den comunidad pa mitiga problemanan social”, el a enfatisa.

Di mesun manera, el a comenta cu nan tambe a papia tocante e necesidad pa introduci leynan local pa duna contenido na tratadonan, asina como tambe a toca e tema cu cierto departamentonan di gobierno tin cu bay wordo maneha door di hende cu nivel academico adecua pa den futuro por haya acceso na fondonan di Nacionnan Uni pa temanan complica manera cambio climatico y desaroyo sostenibel, na unda cu hopi biaha exigencia pa colabora den proyectonan na unda por haya fondo e exigencia ta cu e lead agency di gobierno tin un hende capacita cu e backround academico adecua.

El a duna como por ehemplo cu for di 2008 Antias Hulandes a cumpli cu tratadonan di Viena y protocol di Montreal pa aboli e gasnan cu ta daña capa di ozon, el a papia specificamente di gasnan friu cu ta wordo usa pa airco de casnan, autonan y edificionan comercial.

“Ainda Aruba ta e ultimo pais di seis isla cu no a aboli tur e gasnan aki”, el a bin resalta cu proteha e capa di ozon ta hopi importante pa mitiga e problemanan di cambio climatico.

Ponson a conta cu el a hala atencion di gobierno den e tema cu tur rapport di Organisacion Hulandes pa investigacion di ciencia aplica (TNO) no ta accesibel pa gobierno ni pa esnan interesa, vooral esunnan cu tin di haber cu waste management tanto Parkietenbos como Bubali Plas y e institucion di Parke Marino.

“Nos ta kere cu si nos ta gasta 8 miyon florin di placa di gobierno, di pagado di belasting, mi ta asumi cu gobierno sigur, pero tambe esnan cu ta fia gobierno ta pidi pa haya acceso y mester tin acceso na e rapport, pero esey no ta disponibel”, Ponton a declara.

Alabes, Ponson a afirma cu nan tin un contract firma entre TNO cu un ex-trahado di TNO cu a lanta un organisacion yama Aruba Sustainable Development Association di e cual nan a mira cu e persona aki a keda encarga di tur e documentonan cu TNO a genera, siendo cu TNO ta rapportnan cu a wordo traha cu placa di gobierno y mester ta publico manera el a declara, tambe el a bisa cu minister Armando Rudy Lampe encarga cu desaroyo sostenibel ta esun indica pa duna splicacion con esey a wordo concretisa na final di aña 2019.

Mirando discusionnan fuerte cu na e momentonan aki tin pa loke ta trata Parkietenbos y Bubali Plas, el a conta tambe cu el a bay na un supermercado grandi y cada biaha e ta haya e holo “esey ta corda mi cu nos tin un problema grandi eynan y mi ta kere cu esey ta problemanan cu mester wordo atendi cu urgencia”, el a sigura.

Den otro tema, Ponson tambe a manifesta cu den Parke Nacional Aruba tin cierto cosnan cu nan ta kere cu mester wordo cambia, segun el a bisa, e parke actualmente ta funcionando sub-optimalmente y pa e parke por funciona nan a haya 16 area den cierto parti cu nan mester maneha pero “e parke ey mester di un miho set up y un restructuracion di su funcionamento.

“Nos a haya acceso na datonan di payroll y nos a keda asombra di cuanto placa ta wordo gasta mensualmente den salario di shete manager, siendo cu originalmente e plan di ministernan Ramon Lee y Boshi Wever cu a crea e parke binti tanto aña pasa tabata papia di un management di cinco hende, un director, un director financiero y tres cientifico, awor nos tin un management di un team cu ta casi 11 hende di e cual tur ta ganando un bon salario”, Ponson a manifesta.

Di e tema urgente pa desaroyo economico, el a comenta cu den ora cu gobierno fiha finalmente ROPV, tin cu mantene cierto areanan liber pa sectornan nobo di industria cu mester ta isola of apart di turismo, e unico luga cu ainda segun Ponson tin espacio suficiente ta area di Santa Cruz y San Nicolas, nan como fundacion tin miedo cu si turismo ta wordo permiti pa desaroya tur caminda, “nos no ta bay tin mañan ni e areanan pa high tech industries y menos ainda pa science park y nos ta bay ta condena pa tin turismo so na Aruba”, el a finalisa.