Cambio di clima y proteccion di bida marino mester haya atencion di gobiernonan di Reino

Delegacion di Parlamento di Aruba na IPKO ta bay de acuerdo cu mester urgi Gobierno di Aruba pa proteha bida marino y crea balans entre uso di hende y sostenibilidad di lama, a pesar cu na 2020, a instrui Gobierno pa actua contra leynan existente pa proteha bida marino.

Esaki a bin afo durante e discusionnan na Boneiro riba e retonan di cambio di clima y e compromiso di Reino Hulandes y tur e cuater paisnan pa cumpli cu e asina yama Sustainable Development Goals (Metanan di Desaroyo Sostenibel), SDG’s, di Nacionnan Uni.

Energia pagabel y duradero

Parlamentonan di Reino a discuti e retonan cu ta para dilanti riba e tereno di e Sustainable Development Goals nr 7, cu ta papia di energia pagabel y duradero. Tur cuater pais di Reino Hulandes ta confronta e mesun reto y tur tin meta pa yega na mas fuente di energia duradero. Pero no tur tin e mesun capacidad financiero of e mesun acceso na fondonan pa logra e meta. Esaki ta un di conclusionnan di e reunion di IPKO, esta e Consulta Interparlamentario di Reino Hulandes cu a tuma luga recien na Boneiro.

Reino Hulandes ta forma parti di e Convenio di Nacionnan Uni, y no e paisnan individual. Pero e realidad ta cu e paisnan Hulandes den Caribe tin poco acceso na e proceso contra Cambio di Clima di Nacionnan Uni. Delegacionnan Parlamentario di e paisnan, como tal ta pidi Gobierno di Reino, cu ta Hulanda, pa trece e structura di Reino Hulandes bou atencion di Nacionnan Uni.

Cambio di Clima

Mesun cos ta conta pa e financiamento pa proyectonan dirigi na mitiga cambio di clima. Union Europeo tin fondonan disponible pa Paisnan y Teritorio Ultramar, LGO’s. E delegacionnan lo pidi nan Gobiernonan esta, Hulanda, Corsou, St. Maarten y Aruba pa por coopera miho cu otro pa asina habri acceso na e fondonan aki.

Pero, cada Gobierno lo haya e peticion pa coopera riba investigacion riba dos tereno specifico, cu ta posibilidad pa inverti den geotermia na Isla Riba, esta St. Maarten, Saba y St. Eustatius, y e posibilidad pa un central di energia pasa riba procesamento di sushi pa e tres islanan Corsou, Boneiro y Aruba.

Consumo y produccion responsabel

SDG 12 ta papia di consumo y produccion responsabel, unda mester bin cu economia circular, produccion duradero, reciclahe y procesamento di sushi. E delegacionnan interparlamentario a yega na e conclusion cu ta bay pidi nan Gobiernonan pa stimula posibilidadnan pa agricultura local cu conocemento y experticio for di Hulanda, cu por contribui na mehoracion di salud, sostenibilidad y eliminacion di pobresa.

Tambe lo comparti e miho practica riba e tereno di reciclahe y procesamento di desperdicio. Asina ta bay pidi Gobiernonan pa investiga posibilidad pa cobra ‘statiegeld’ riba bleki chikito y boter y pidi placa pa tasnan di plastic na tiendanan, cu ta similar cu pasonan na e parti Europeo di Hulanda (Aruba ya no tin saco di plastic y tasnan cu mas uzo ta obtenibel pa un prijs).

Delegacionnan ta bay pidi Gobierno di Reino, na number di Aruba y St Maarten pa pone riba papel kico ta e beneficio of no di un miembresia independiente na e organisacion mundial di comercio, WTO, banda di e miembresia existente di Reino Hulandes. Ademas ta pidi Gobierno di Reino pa sigui sostene e trayecto cu Corsou a cuminza pa drenta WTO.

Accion di Clima

SDG 13 tin di haber cu pasonan cu paisnan mester tuma pa mitiga cambio di clima. E accion di clima ta responsabilidad di tur e Gobiernonan. Como tal a discuti e retonan cu ta bin pa motibo di cambio di clima. Nivel di lama cu ta subi ta conta pa tur e islanan, pero mas crucial ta pa haci e islanan resiliente contra horcan. Pues, tur Gobierno mester mustra ambicion conhunto y hunto traha riba accion di clima, tanto pa mitiga y adapta, pasobra e cambionan di clima tin impacto pa tur e paisnan den Reino.

Bida marino

E cuater delegacionnan a papia tambe riba SDG 14 cu ta e bida marino. E lamanan rond di e paisnan den Reino ta bou menasa debi na cambio di clima, e awa ta bira mas cayente. Pero tambe pa motibo di e impacto di accion di hende, manera polucion y sobrepesca. E lamanan ta y lo keda un fuente importante pa entrada di tur e paisnan y como tal mester keda proteha. Mester busca e balans corecto entre uso di hende y proteccion (red. asina mes Parlamento di Aruba a instrui Gobierno pa bin cu maneho di tolerancia pa tiramento cu harpun sin cu a introduci ningun tipo di control adicional. No tin control kico tur ta saca for di awa, y hasta e Minister di Sector Primario Demisionario tabata sostene e sacamento di kreeft for di awa, a pesar cu e ta un animal protegi segun e ley di proteccion di naturalesa).

E conclusion riba e tema di sostenibilidad segun e palabracionnan haci na IPKO ta cu e delegacionnan lo keda haci pregunta na nan Gobierno riba e temanan medio ambiente, clima y bida marino. Y nan lo tene otro Parlamentonan informa unda por intercambia miho practicanan.