(AP) — Gobierno Cubano a bisa diahuebs cu ta bay reconoce – y regula – criptomonedanan pa pagonan riba e isla.
Un resolucion publica den e Gazette Oficial a bisa cu Banco Central ta bay pone reglanan pa e sorto di moneda aki y determina con pa licencia proveedornan di servicionan relaciona dentro di Cuba.
E popularidad di criptomoneda a aumenta entre un grupo cu conocemento tecnologico na Cuba, ya cu a bira mas dificil pa usa dollar, en parti pa motibo di reglanan di embargo imponi bao ex-presidente Mericano, Donald Trump.
E pais Centro Americano di El Salvador recientemente a anuncia cu ta bay reconoce uso di criptomoneda Bitcoin como un manera pa curasha remesas di su ciudadano bibando den exterior. E moneda, cu salvahemente ta subi y baha di balor, usualmente ta independiente di cualkier banco central y ta usa codigonan di computer blockchain distribui ampliamente pa track transferencianan.
Pasobra por usa nan pa transaccionnan riba distancia largo cu ta supuestamente anonimo, hopi biaha nan ta popular entre hendenan cu ta purba di evadi regulacionnan di gobierno – probablemente incluyendo restriccionnan di Merca riba manda placa na luganan manera Cuba.
E resolucion ta bisa cu e Banco Central por autorisa uso di criptomoneda ‘pa motibonan di interes socioeconomico’ pero cu e estado sigurando cu nan operacionnan ta controla. Tambe explicitamente a nota cu operacionnan no por involucra actividadnan ilegal.
Un experto local di criptomoneda, Erich Garcia, a bisa cu algun Cubano ya ta usando esakinan, hopi biaha mediante gift card, pa compranan online.
