Fundacion Refugio Social: ‘Nos speransa ta pa Fundacion Refugio Social lo ta e prome asilo masculino den e region’

Ayera diabierna Fundacion Refugio Social tabata un di stakeholders cu a reuni cu formado pa asina duna un splicacion con e reunion a bay y informacion di e fundacion pa trece un claridad pa loke ta trata refugio social.

Fejike Zijlstra director di e fundacion aki a expresa cu nan tin speransa cu pa luna di april di otro aña refugio social lo bira e realidad mes, pa motibo cu nan tin e edificio, nan ta wardando riba permisonan di DOW pa asina sigui cu e renobacion di e cas cu ta existi caba cu mester wordo renoba, tambe a conta cu dentro di tres luna e trabounan aki por keda cla.

E vision di e fundacion ta pa nan duna asilo pa hendenan cu ta den crisis vooral ora tin mester di un luga pa drumi of ‘un dak riba nan cabes’ manera Zijlstra a bisa, den comunidad tin hende cu algun biaha ta keda afecta pa un problema relacional na cas pero cu na e momentonan aki no ta existi un luga pa esey, na e momento ey un instancia por manda e persona aki cerca e fundacion pero e instancia lo sigui cu su guia.

“Nos speransa ta pa Fundacion Refugio Social lo ta e prome asilo masculino den e region” el a señala cu nan no ta bay guia casonan, nan lo traha conhuntamente cu instancianan cu lo trece hende, como por ehemplo, si departamento di Asunto Social (DAS) tin cliente cu mester di un crisis asilo, nan lo tin cu gui’e pero nan ta duna e asilo na prome instancia.

Zijlstra a afirma cu ta mesun ehemplo cu e parti di trafico y comercio di humano na unda e instancia ta duna e guia y e fundacion ta duna e servicio di hospitalidad na unda nan tin un cushina y cussssss e clientenan por haci uso di e cushina aki cu lo mester bira un cushina social, manera el a enfatisa cu sabiendo cu hopi adulto mayor e mayoria di biaha no tin e posibilidad di come un cuminda cayente tur dia y nan lo kier ofrece e parti ey.

Ta p’esey cu nan kier traha hunto cu studiantenan di EPI y EPB cu ta duna e parti di HORECA y tambe yuda pa den refugio e personanan por siña di e parti aki.

Di e edificio el a señala cu den e parti pa atras tin un capacidad pa tene 16 persona, den e crisis asilo nan ta pensa den e posibilidad di tene nan pa 30 dia, prome cu esey Departamento di Asuntonan Social y Cruz Cora tabata wak 72 pa ora pero segun Zijlstra “bo no ta logra nunca pa bo por yuda un hende cu un yudansa corecto, p’esey nos ta pensa riba mas dia”.

Riba e parti di trafico y comercio humano el a declara cu mientras ta haci e investigacion lo tene e personanan cu un maximo di seis luna.

Un ehemplo cu el a trece dilanti ta e caso di e personanan cu a perde nan cas pa via di candela na Tamarijn, el a sigura cu Cruz Cora no tin asilo pa e personanan aki, departamento di Asuntonan Social ta esunnan cu mester yuda nan cu un asilo cu lo ta sali hopi caro, si nan fundacion lo tabata funcionando caba via DAS ta tuma contacto cu e fundacion pa asina e hende por keda den asilo mientras cu e ta wordo yuda pa con e lo sigui bay dilanti.