Casi cuatro aña pasa, na luna di october 2017, Bon Dia Aruba a dedica un Analisis special na e tantisimo ruinanan, kico por haci eventualmente cu e ‘monumentonan di descuido’ aki cu ta dorna tur bario na nos isla.
Riba e potret acompañante aki por ‘aprecia’ e aspecto menos bunita cu un di nan ta duna bario di Paradera pa mas di tres decada caba. E ta situa net dilanti di oficina di Wit Gele Kruis y ta realmente un misterio con e tipo di situacion aki por perdura pa tanto aña sin nada ta sucede.
Nan ta hopi mas, tanto riba tereno di propiedad priva como riba tereno erfpacht. Den e ultimo caso aki lo ta mas facil pa nos autoridadnan actua, como cu ta trata di propiedad publico, pa e tereno mal ocupa aki por bin na disposicion di otro ciudadano cu por haci bon uso di esaki. Sigur si autoridadnan mes ta sclama regularmente tocante e escasez di tereno, ta dificil pa comprende cu nada ta sucede pa recupera e terenonan aki y haci uso di nan. Pero tambe den caso di tereno y propiedad priva, gobierno tin e instrumentonan legal, por ehemplo di Ordenanza di Construccion y Vivienda (Bouw- en Woningverordening; AB 1999 no. GT 9) cu ta duna e posibilidadnan di actua, ora e tipo di construccion bandona aki ta representa un peligro pa su alrededor.
Nos redaccion a purba tuma contacto cu Departamento di Insfrastructura y Planificacion (DIP), pero aparentemente e telefonista ta cu reces.
