California tin plan di implementa tratamento unda cu ta paga drogadictonan pa keda sin usa droga

(AP) – Frustra pa e aumento fuera di control di mortonan relaciona cu sobredosis di droga, California su lidernan ta purbando un strategia radical; Nan kier ta e prome estado cu ta paga hende pa keda sobrio.

E gobierno federal tin ya ananan largo ta haci esaki cu e veteranonan militar, y investigacionnan ta demostra cu e ta un di e maneranan mas efectivo pa hende por stop di usa droga manera cocaina y metamphetamina, stimulantenan pa cual no tin ingun tratamento pharmaceutico disponibel.

E ta traha di e manera aki; Hendenan lo gana un pago chikito pa cada test di droga negativo durante un periodo di tempo. Mayoria di hendenan cu completa e tratamento aki sin ningun test positivo por gana algun shen dollar. Usualmente nan ta haya e placa aki den forma di “gift card.”

E tratamento aki ta yama Contingency Management y gobernador Gavin Newsom a pidi e gobierno federal pa permiso pa usa e dollarnan paga den impuesto pa paga e tratamento aki pa medio di Medicaid, e programa di seguro di salud tanto estatal como federal pa e hendenan di clase abao y desabilita cu ta cubri casi 14 miyon hende den California.

Mientrastanto, un proposicion similar ta moviendo den California su legislatura democraticamente controla. Ya caba el a pasa den e senado cu ningun oposicion, y ta pendiente den e asamblea, unda cu e tin un co-autor republicano.

“Mi ta kere cu tin hopi den e strategia aki pa tur hende por gusta y beneficia,” senador di estado Scott Wiener, un democrata di San Francisco y autor di e peticion a bisa. “Y e aspecto mas importante ta, cu e ta funciona.”

Con hopi e lo costa ta depende di cuanto hende participa. E programa cubriendo 1,000 persona por costa te hasta 286,000 dollar, cual no ta hopi den bista di California su presupuesto di operacion cual ta di mas di 262 biyon dollar.

E San Francisco AIDS Foundation, ta un agencia cu ta traha cu fondonan priva y ta provee programanan di maneho, aki ta unda Tyrone Clifford, ken tabata adicto na meth, a inscribi su mes y nan a priminti di paga su persona pa cada test negativo cada pasa 12 siman.

Su prome pago tabata di 2 dollar. Esaki a keda aumenta cu cada test negativo, te ora cu el a logra un total di 330 dollar.