Cuanto studiante…Y cuanto docente IPA tin…?

Den nos edicion di dialuna 23 di augustus ultimo, nos a publica un entrevista extenso cu dirigencia di Instituto Pedagogico Arubano (IPA), instituto responsable pa preparacion di nos maestronan pa enseñanza basico, principalmente. Tin otro tarea tambe di training adicional pa personal den educacion, pero laga nos concentra un rato riba e maestronan cu despues di nan certificacion na IPA ta pasa pa duna les na nos scolnan basico. Tin varios pregunta cu a surgi cerca nos despues di lesa e entrevista extensamente, pasobra e ta un tema demasiado importante pa no duna un follow up.

Pa cuminza e aspecto financiero. Ta bisa cu e instituto ta opera cu un budget di 9 miyon florin. Tumando como punto di salida cu e tipo di operacion aki ta dedica sigur 90% di nan recurso na gasto di personal, nos mester conclui cu, si e scol tin 200 studiante, e gasto pa studiante ta mas cerca di 40.000 florin pa aña, cu e 30.000 florin menciona? Y esey ta haci necesario e siguiente pregunta, cu ta: cuanto docente tin pa cuanto studiante? ‘Just asking…’ Nos ta corda tambe cu un par di aña pasa e actual ministro encarga cu enseñanza tabata adverti pa e hecho cu cierto aña no tabatin ni 20 studiante nobo, loke tabata crea e duda si numericamente e instituto lo por a entrega e cantidad di graduado cu nos mester den enseñanza basico. Atrobe, just asking…

Pero tin otro aspecto pa considera, y esey ta cu e dirigencia mes ta pone dos problema nos dilanti. Un ta e nivel di e studiantenan ora nan drenta IPA. Esaki den varios caso no ta suficiente y despues di un lucha ehemplar, den e mihor caso, nan ta gradua ‘di baina’; expresion usa den e entrevista, no inventa pa escritor di e Editorial aki. Esey ta e siguiente problema, pasobra segun nan mes nos lo ta introduciendo hende den e scolnan cu realmente no ta bon prepara pa duna les, sigur no den e situacion bastante problematico na nos isla. Imagina por ehemplo e problema di duna les na un grupo bastante mixto, di diferente background di nacionalidad, idioma, cultura, etc. Un situacion cu no ta existi solamente awe so, pero cu ta un problema pa mas di 30 aña caba, desde cu nos a subi e caminda di aumenta e poblacion drasticamente, sin cu a tuma e pasonan necesario pa atende e asunto aki. Aparentemente e tabata un asunto excepcional pa asina hopi tempo cu ya el a bira ‘normal’. Esey no ta implica si cu nos a haya e manera con pa deal cu e situacion aki.

Nos por corda con hopi aña pasa un maestro inteligente na un scol basico na Aruba a haya un alumno di origen Arubano/Hulandes, cu a biba algun aña na un pais di habla hispana, y a pone e mucha aki sinta, rondona pa e ocho muchanan Latino cu e tabatin den su klas. Asina e alumno aki a bira inconscientemente ‘ayudante’ di e maestro pa yuda e alumnonan Latino cu nan Hulandes. E maestro a conta e mayornan esaki y tabatin nan aprobacion tambe, pa evita comentario cu nos por haya, cu no por haci e tipo di cos aki cu mucha. Nos ta conta esaki solamente pa ilustra bao ki tipo di condicion nos maestronan mester traha y, manera ta bisa na Spaño, mester ‘hacer de tripas, corazón’. Na 2021 esaki no a cambia, igualmente e mesun incertidumbre y duda encuanto ki idioma pa usa. Ta berdad cu den e ultimo 30 aña aki e conocimento general di Hulandes a bay mas y mas atras, cu resultado cu hasta den e aparato gubernamental mester busca hende cu sa Hulandes drechi cu un lampi. Y di esnan cu ta gradua na IPA, nos no ta spera cu esey ta mucho mihor, mientras cu hasta den uso di Papiamento nos no ta convenci cu e nivel ta suficiente pa duna les. Y den tur esey ainda no a contesta e pregunta clave, cu mester hiba nos, manera e expresion ta: ‘pa tera of pa lama’.

E decision clave ey ta dificil pa tuma, si nos no tin un vista cla unda nos kier bay cu nos desaroyo socio-economico den e proximo 40 o 50 aña. Esey mester sucede pa nos por dicidi kico ta importante pa siña un mucha den enseñanza basico, y crea un ambiente den cual e ta siña esaki tambe. Esey actualmente no ta e caso, y nos ta entrega studiante bao nivel na educacion secundario, cu tambe ta keda bao nivel… y asina e circulo ta keda rond.

Esaki ta trece nos riba e punto cu si bo kier resultado sigur, bo tin di eherce e control necesario riba e maestro y percura pa e cumpli. Y pa e cumpli mester pone disponible e instrumentonan cu e mester pa traha, y esey ta costa placa… Ki dia nos ta cuminza comprende cu si mester mehora enseñanza, mester mehora nivel di maestro; no por sigui acepta esnan cu ta haya diploma ‘di baina’. Y si mehora enseñanza ta prioridad, desperdicio di placa na grandi na cosnan inutil mester caba. Esey ta entre otro e tarea dificil pa cualkier cu ta desea di goberna den e proximo añanan. Acuerdo di gobernacion mester duna nos mas cu un manyen di lema bunita.