DOW tabatin tur su ekipo y pompnan na luganan di riesgo pa asina evita cu casnan por a yena cu awa. Y Director di DOW ing. Marlon Croes ta contento cu no tabata hopi caso di inundacion durante e dianan di yobida tras di lomba. Berdad tabatin caso unda awa a acumula despues di e yobidanan, pero en todo caso, no tabatin casnan cu a yena ni camindanan principal cu a keda inaccesibel.
Tabatin atencion specifico pa Bubali Plas, cu ta tuma tur awa purifica, pero tambe ta e ultimo punto pa colecta awa di yobida cu bin di Westpunt, Noord y Sabana Liber, prome cu e bay lama. A monitorea e nivel di e plas pa mira si ta necesario pa habri e sluisnan pa lama, pero esey no mester a sosode e siman aki, Croes a splica.
Saliña
Fundacion Parke Nacional Aruba di su parti a haci uso di e oportunidad pa ilustra con un par di dia di yobida por yuda naturalesa di Aruba. Pero mas tanto a enfatisa e balor di e saliñanan riba dianan di yobida. Segun FPNA, saliñanan tin un funcion ecologico crucial y ta un parti esencial di nos sistema natural di irigacion di awa
Aruba ta un di e islanan mas seco den e region di Caribe, pero cu por experencia awasero fuerte durante temporada di yobida. Ta evita inundacion naturalmente pa e sistema di irigacion integral di rooinan cu ta canalisa e awa pa e diferente saliñanan y despues lama. Aunke ta considera e diferente saliñanan frecuentemente inutil, como ‘un area di lodo’ cu tin biaha ta yena, “hecho ta cu nan ta forma parti di areanan cu ta inunda ora e nivel di awa di lama subi of parti di un lagun di awa dushi of behia y tambe na final di un sistema di rooi pa filtra e awa,” FPNA a bisa. E areanan aki ta extremadamente productivo pa invertebrado (bichi, cocolishi y cangreu), cu ta atrae diferente bestia, incluyendo parha (migratorio), cu ta depende di e fuente di alimento y refugio aki.
