Parlamentario drs. Mervin Wyatt-Ras durante conferencia di prensa semanal di fraccion y di partido AVP a trece su preocupacion padilanti pa loke ta trata e virus devastador Covid-19. E parlamentario a señala cu nos ta den di cuater wave di Covid-19 y ta nota cu tin un situacion mundialmente preocupante.

Desde maart 2020 nos pais a ser confronta cu e prome casonan, net despues cu WHO a declara coronavirus como un pandemia. Prome cu esaki Wyatt-Ras y su fraccion ya caba a manda preguntanan den direccion di gobierno paso por a nota cu e virus a cuminsa plama y contagia den diferente pais, crusando fronteranan. Aruba no a tuma pasonan necesario. Ta na e momento cu WHO a declara e virus como un pandemia a cuminsa cu e trayecto aki.

E lockdown di maart te cu juli 2020 a afecta nos economia grandemente. Cantidad di empleado mester a bay cas. Tin di nan mester (a) biba di FASE y loonsubsidie. Otronan mester a busca un pakete di cuminda di sea Fundacion pa nos Comunidad of Rode Kruis of famia. Den e periodo prome cu augustus di e aña aki e situacion a trankilisa un tiki y awor nos ta haya nos mes confronta atrobe cu un ola grandi di Covid. Wyatt-Ras a manda diferente pregunta pa minister di Salubridad dia 6 di augustus pa haya aclaracion y te ainda no a haya contesta. Un di e preguntanan ta pakico no a fortifica e diferente reglanan di higiena pa preveni medidanan? Por a bay poco poco, p.e. controla bistimento di tapaboca tur caminda y uzo di hand sanitizer prome cu a yega asina leu pa impone medidanan, manera toque de queda. Por a anticipa y tuma precaucion. Ta na momento cu nos a cay den color cora como reisadvies a core tuma medida.

Ora bo pais ta cay den color cora bo ta ser considera como region di risico mas halto sea pa seguridad y pa salud. Alabes a laga yega asina leu cu e cantidad di casonan na Hospital a crece y cu ICU a yega na su capacidad maximo, dor di cual ta manda pashentnan di ICU pa Colombia. Aki gastonan di AZV lo sigui subi. Un situacion en berdad preocupante. Den Hospital tin tambe cantidad di persona cu ta interna y cu ta grave. Dokternan, specialistanan y enfermeronan tin nan mannan yen. Na e momento aki tin 47 pashent interna cu COVID-19.

Di e cantidad di pashentnan rond di 80% no ta vacuna. Pues e necesidad t’ey pa nos ciudadanonan vacuna. Tin un discusion encuanto di esaki. Di un banda tin cu vacuna pa salvaguardia bida di nos ciudadanonan y di otro banda tin cu respeta opinion di esnan cu no kier vacuna. Locual virologonan na Hulanda a constata ta cu e variante Delta ta contagia hopi rapido. E contagio tambe ta cerca esnan cu vacuna, kendenan por manifesta sintomanan (leve) y por transmiti e virus pa otro. Pues vacuna ta necesario, aunke e no ta duna garantia total. E vacuna ta zorg cu ora haya e virus e consecuencianan no ta asina fuerte. Pa e motibo ey tur persona cu wordo vacuna, toch mester tene su mes na tur regla di higiena y bisti tapaboca.

E medidanan cu a wordo tuma dia 22 di augustus ultimo, cualnan ta e.o. esun di toque de queda di 10 or anochi pa 5 or di madruga, tambe cu den establecimento no por tin 4 persona na mesa, samenscholingsverbod y e capacidad di personanan limita den establecimento, tin consecuencianan desbentahoso pa comercio y pa trahadonan pa perde nan trabou. Segun e parlamentario Gobierno por a consulta cu comercio prome cu tuma tal decisionnan drastico. Aki por constata atrobe cu gobierno no ta transparente y no ta dialoga prome cu tuma decision afectando ciudadanonan.

Un otro preocupacion ta apertura di scolnan na september. Teniendo cuenta cu muchanan mas hoben cu 12 aña no por ser vacuna, por señala cu si e muchanan wordo contagia, e contagio por sigui na cas. No solamente mayornan, sino tambe welo(a), tanta grandi y leidsternan cu ta cuida e muchanan por ser contagia. P’esey ta importante cu e decision tocante apertura di scol ta ser tuma no solamente dor di crisis team hunto cu Ministro Presidente, sino tambe hunto cu scolnan. scolnan mester garantisa higiena deseabel pa muchanan por mantene nan mes na labamento di man continuamente y tambe pa nan por bisti tapaboca. Tur esakinan mester ta bon in place pa evita cu e variante di Delta ta keda aumenta. Wyatt-Ras ta spera cu no lo mester bin un otro “lockdown”.

Locual ta sumamente necesario ta e control. Paso aunke cu ta impone medidanan drastico, toch por nota cu den diferente establecimento ainda no ta cumpli cu lo basico esta di bisti tapaboca y mantene distancia social.

Pa loke ta trata e vacuna. Wyatt-Ras ta haya e impresion cu e minister encarga cu Salubridad ta considera vacuna como e solucion pa disminui casonan. Segun Wyatt-Ras esey no ta e unico solucion. Banda di vacuna mester otro formanan di higiena in place. Tampoco no ta un opcion pa bringa cu esnan cu no kier vacuna. Wyatt-Ras a trece na varios ocasion padilanti cu na otro paisnan ta ubica e centronan di vacuna chikito mas cerca di ciudadanonan. Ta baha e drempel pa yega. Te hasta por haci uso di bus di salud pa pasa den barionan. Wyatt-Ras a finalisa deseando tur persona cu ta luchando cu e virus aki, esnan den hospital of ICU pronto recuperacion. Alabes palabra di aliento na tur esnan cu a perde nan sernan keri.