Sindicato ni gremio empresarial a gana tanto cun’e…
Den e dianan aki e discusion tocante Dialogo Social a recobra forsa, traves di e opinion di e federacion sindical den sector priva mas grandi cual ta FTA. Nan ta expone nan decision pa no participa mas na Dialogo Social, manera esaki a funciona te awor. Desde aña pasa practicamente e dialogo ta morto, y esaki pa varios motibo. Un motibo ta e cu e sindicatonan, a keda desapunta con e asunto a bay den e introduccion di cambio di edad di pension y aumento di e prima di AOV cu 2%, un pa e trahado y un pa e dunado di trabao. No tabatin un base pa bay solamente te 62 aña, cu e empresarionan na fabor di 65 aña, y cu e cifranan cu tabata mustra cu lo mester a bay pa 65 aña en todo caso. No por a yega na un protocol riba esaki y finalmente gobierno a bay Parlamento cu e opcion di 65 aña, yegando na esaki den 10 aña. Esaki tabata un di e poco victorianan di e gremionan empresarial, cu a para firme pa bay 65 aña den un solo biaha. Tempo lo mustra si tabata necesario pa salba e fondo di AOV di e manera aki.
Otro aspecto hopi importante ta e hecho cu mayoria di sindicato na mesa den dialogo no ta representa e grupo grandi di trahado den sector priva, pero mas bien e minoria di empleado publico y di algun empresa estatal. E dialogo desde su inicio tabata mustra un desbalansa unda e gran mayoria, cu excepcion di FTA, tabata representa e trahado publico, cu tin nan interes particular. Otro sindicato fuerte den sector priva manera STA no ta participa na e dialogo.
Ora na juni 2014 den negociacion directo entre sindicato y gobierno a keda acorda un reforma di e sistema di pension di APFA, y en cambio e sindicatonan a logra haya un compromiso preto riba blanco di gobierno pa sigura indexering te cu aña 2024, tabata previsibel cu e interes pa banda di e sindicatonan gubernamental pa participa na e dialogo lo baha considerablemente, ya cu nan a logra caba loke nan tabatin di logra te 2024. Si acaso nan bin na mesa, lo tabata pa scucha problema cu gobierno ta aden y kico ta spera di nan na sacrificio pa yuda resolve esaki.
Awor cu FTA tambe ta distancia su mes di e dialogo, por yega na e conclusion cu di e manera aki e dialogo no tin ningun perspectiva pa haci un comeback. Si acaso lo kier pone e forma di consulta entre gobierno, sindicato y gremio empresarial cana atrobe, lo mester haci algo pa esey sucede.
Ban cuminsa cu bisa cu en principio e consulta tripartiet entre e tres partnernan social por ta beneficioso pa un pais, y nos por mira cu internacionalmente semper ta boga pa cualkier pais practica algun tipo di dialogo, segun e custumber y caracteristicanan di cada pais. Tambe, e dialogo por ta exitoso solamente si tin seriedad absoluto di tur tres partido. Aki caba nos por ripara cu tin algun discordia; e gremionan empresarial y tambe algun sindicato, ora algun tempo pasa gobierno a celebra 5 aña di e dialogo, a duna di conoce cu en berdad e dialogo tin su balor, pero cu te na e momento ey ta gobierno unilateral ta establece agenda y den ehecucion di e acuerdonan ta duna prioridad principalmente na loke ta conveni gobierno, y haciendo caso omiso na otro acuerdo cu tabata importante pa e dos otro partnernan. Tambe tabatin cierto trabao cu no a haya baloracion nunca, manera un rapport traha pa e comision encarga cu enseñanza, cu nunca a ser discuti y mucho menos aproba den e dialogo.
Otro comision cu a produci un rapport cu bastante recomendacion util tabata esun cu a traha riba mehoramento di proceso y procedura den gobernacion y a haci recomendacion pa yega na un asina yama ‘one stop shop’. Den e tempo despues Camara di Comercio a sigui riba e tema aki, loke aparentemente te awe a resulta solamente den un reaccion di frialdad pa banda di gobierno, y principalmente di Prome Ministro. Logico cu den e ambiente aki practicamente nada a ser haci tampoco pa mehora e ambiente di haci negoshi na Aruba, un tema hopi importante, no solamente pa e inversionista stranhero cu ta desea di bin inverti na Aruba, sino tambe y principalmente pa e empresario chikito y mediano local, cu ta mira solamente cu dia pa dia e mester paga mas, pero no ta mira ningun beneficio ta bin den su direccion. Ultimamente nos por a presencia e fracaso di e plan pa modernisa e regimen fiscal, cu por cierto por tabatin algun mehoracion aden pa e empresario. Ni esey no a logra y e pregunta ta si e gobierno aki, mita caminda den su di dos periodo, tin e animo ainda pa mehora algo den gobernacion na fabor di e ciudadano y e empresario. Por lo pronto e perspectiva ta cu nos ta bay direccion eleccion 2017, sin cambio mayor.
Publica den Bon Dia Aruba 1 december 2015
