(AP) — Websitenan di Taliban cu a duna e mensahenan oficial di e insurgentenan victorioso na Afghanonan y mundo en general den cinco idioma a bay offline abruptamente riba diabierna, indicando un esfuerso pa purba di caba cu nan.
No ta inmediatamente conoci, sinembargo, pakico e website den idioma Pasto, Urdu, Arabe, Ingles y Dari a bay offline diabierna. Nan tabata protegi pa Cloudflare, un proveedor red di entrega di contenido y proteccion di DOS basa na San Francisco.
Cloudflare no a responde na email y yamada di telefon pidiendo comentario riba e desaroyo, cu a keda reporta prome pa The Washington Post. E escudo di Cloudflare ta preveni publico di sa ken exactamente ta host e website.
Tambe diabierna, WhatsApp a elimina un cantidad di grupo Taliban, segun Rita Katz, director di SITE Ingelligence Group, cu ta track extremismo online.
Desaparicion di e websitenan por ta solamente temporario mientras e Taliban ta sigura areglonan di hosting nobo. Pero e eliminacion di e gruponan di WhatsApp a yega despues di e prohibicion di cuentanan di Taliban na Facebook, compania mama di WhatsApp, riba diamars despues cu e gobierno Afghano sosteni pa Merca a cay den man di Taliban.
Vocero di WhatsApp, Danielle Meister no a confirma e eliminacion, pero a referi AP na un declaracion cu e compania a duna siman pasa bisando cu tabata ‘obliga pa adheri na leynan di sancion Mericano. Esaki ta inclui prohibi cuentanan cu ta parce di representa nan como cuentanan oficial di Taliban’.
Katz a bisa via email cu e tabata spera cu e eliminacion di e websitenan di Taliban ta apenas e prome stap pa disminui su presencia online.
A diferencia di e Taliban di 20 aña pasa cu Merca a saca di poder na Afghanistan, e Taliban actual ta inmensamente bon cu tecnologia y su infrastructura online ta ‘inspira y mobilisa’ al-Qaida y otro fraccionnan Islamico extremista, Katz a bisa.
“Companianan tecnologico mester haci loke nan por pa tuma control di e problema aki lo mas pronto posibel, ya cu e presencia online di e grupo ta impulsando un movemento jihadi cu curashi mundialmente”, el a agrega.
Twitter no a elimina cuentanan di Taliban y vocero di e grupo, Zabihullah Mujahid tin mas di 300mil siguido eynan. E compania a indica diamars ultimo cu tanten cu e cuentanan aki observa su reglanan – incluyendo no incita ni glorifica violencia – nan ta bay keda.
Manera Facebook, YouTube di Google ta considera e Taliban como un organisacion terorista y ta prohibie di opera cuenta.
Taliban no ta riba e lista di organisacionnan terorista stranhero di Merca, pero Merca a impone sancionnan riba dje.
