Imposibel mira esaki los di situacion na Venezuela
Siman cu a pasa gobierno a comunica cu CITGO, e sucursal Mericano di PDVSA, a confirma cu nan ta continua e proceso di ‘due diligence’ cu por hiba nos na un reapertura di e refineria di Valero. Prome cu esey sucede, ta hopi cos mester pasa ainda. Ora CITGO dicidi cu nan lo kier tuma e refineria, ta habri e fase di negociacion cu e propietario cu ta Valero. Te awor e compania aki a keda den sombra, ta solamente gobierno di Aruba ta esun cu ta publica opinion tocante con leu e asunto ta para. Invariablemente e curso ta parce di ta di optimismo modera, sin ningun comentario riba e puntonan menos positivo cu sigur tambe ta hunga un papel.
Por ehemplo, cu nos ta un siman ainda di eleccion na Venezuela cu por trece un cambio radical den e pais bisiña aki. E cambio ey por significa otro gobierno cu otro ideologia, cu lo bandona e politica socialista di gobierno di Nicolás Maduro. Pero esey por tuma luga solamente si despues di un eventual derota electoral e Chavistanan entrega poder. Si no, por inicia un conflicto arma sin precedente cu pa basta tempo por impedi negociacion cu gobierno y e empresa estatal PDVSA, cu al fin y al cabo ta dicidi kico e sucursal na Merca ta haci. En todo caso Venezuela su dependencia riba petroleo ta asina grandi – mas di 95% di su entrada di divisa – cu ningun gobierno por sobrevivi sin e beneficionan di e industria aki. Esey ta implica cu ‘cueste lo que cueste’ tur gobierno lo percura pa cumpli cu nan compromisonan den e sector aki pa no pone e divisa aki na riesgo.
Segun varios medio internacional, gobierno di Venezuela tin asina poco divisa den efectivo, cu nan a cuminsa bende parti di nan reserva di oro pa por cumpli cu nan pagonan internacional. Di awor pa fin di 2016 Venezuela tin casi 16 biyon di dollar na prestamo pa paga. Aparentemente Venezuela tin solamente alrededor di 15 biyon dollar na reserva, di cual un gran parti den oro, banda di 1 biyon dollar so den efectivo. Venezuela ta depende di petroleo pa sobrevivi, pero cu prijs di crudo na menos cu $45 pa bari, y un produccion cu no ta crece, e situacion aki lo no drecha pa basta tempo.
Esey ta trece nos atrobe riba e tema di refineria na Aruba. No tin ningun duda cu Venezuela, PDVSA y CITGO por beneficia di un refineria operando na Aruba, cu ta abastece Venezuela di e nafta cu nan mester pa por aumenta e produccion di crudo pisa. E problema no ta den e deseo, sino den e posibilidadnan pa financia e asunto. Kico ta e caso? E motibo pa cual probablemente a hinca CITGO den e wega ta cu PDVSA mes a negocia ampliamente cu Valero tocante reapertura na 2013, y no por a yega na un acuerdo. E tempo ey PDVSA, cu ya caba tabatin problema financiero, a propone pa Valero inverti den e start up y cu PDVSA di su banda lo a paga cu crudo na luga di placa. Valero no a acepta y e refineria a keda cera. Ki posibilidad financiero CITGO tin anto? Despues cu aña pasa PDVSA tabata kier a bende CITGO den su totalidad, y cu Valero mes tabata un di e candidatonan pa cumpra, diripiente nan a para e benta y na januari di e aña aki a pasa pa purba haya un prestamo a base di bonds grandi di 1,5 biyon dollar cu tabata parcialmente pa duna PDVSA como dividend. Tambe CITGO tabata busca un prestamo adicional di 1 biyon dollar, pa cera 2,5 biyon intenciona mayoritariamente pa sostene e compania madre na Venezuela, y via esaki gobierno Venezolano. Segun e comentarionan den prensa Mericano, di e manera aki gobierno di Venezuela tabata purba haya placa for di CITGO, despues cu e benta di e propiedad no a logra na 2014. Esaki principalmente pasobra e companianan petrolero cu a perde propiedad den e nacionalisacion cu Chavez a impone na 2003, tabata en busca di pone embargo riba e placa di e posibel benta na momento cu lo a logra bende e compania.
Tin hasta comentario cu ta sugeri cu PDVSA y gobierno Venezolano ta laga e compania tuma tur e debenan aki riba dje, pa despues eventualmente default riba e pagonan y haci cu e creditornan por tuma e propiedad, di e manera aki librando di e propiedad aki sin cu e otro companianan cu tin claim riba estado Venezolano por pone man riba esaki.
E pregunta clave na e momento aki ta anto: un compania cu tin sumanan grandi di prestamo riba su lomba, cu no ta consecuencia di su operacion mes como empresa, sino di manipulacion politico, na e momento ta e partner cu Aruba ta busca? Y e otro pregunta ta: e compania aki por haya ainda e prestamonan necesario pa financia compra, renobacion y operacion di e refineria na Aruba? Nos ta keda pendiente pa e contestanan.
Publica den Bon Dia Aruba 30 november 2015
