Dificil pa crea programanan cu ta dirigi na contexto di Aruba sin cu e ta costa placa. Y dificil pa competi cu institutonan cu no mester desaroya na propio material. Esey ta e realidad di Instituto Pedagogico di Aruba, segun su ehecutivonan Director General drs. Marilyn Richardson, Director ‘Initiële Opleidingen’ Berthson Boekhoudt, MSc y Director ‘Professionalisering’ drs. Marisol Croes.

E ekipo a combersa cu Bon Dia Aruba riba e retonan cu IPA ta confronta y e percepcion cu ta existi riba e trabou di e instituto, cu ta carga e responsabilidad pa produci maestro y recapacitacion di e profesionalnan cu ya caba ta trahando.

30 mil

A acerca IPA riba e inkietud cu Minister di Enseñansa Demisionario Rudy Lampe a trece dilanti. Esta cu Aruba ta paga 30 mil florin pa cada studiante cu ta atende IPA, un suma cuantioso cu ta mas halto cu hasta pa e studiante cu ta atende Universidad di Aruba.

Drs. Marilyn Richardson a bisa cu berdad e presupuesto di IPA ta halto, cu un averahe di nuebe miyon pa aña (cifra 2020) Y berdad ta cu hopi di e suma ta bay pa paga salario di docente di IPA. E gasto operacional mes, ta relativamente abou. “Y si ta wak unicamente e programa di estudio pa bira docente, kizas lo por bisa cu IPA ta caro. Pero IPA no ta brinda un solo estudio pa bira docente, sino ta brinda servicio na henter e comunidad di docentenan cu ta trahando y cada biaha mester di recapacitacion.”

Den otro palabra, IPA ta un organisacion multifacetico cu responsabilidad mas amplio.

IPA ta caro?

IPA ta caro den sentido cu tin un gasto di personal halto. Pero hopi biaha ta mira solamente e cantidad di studiante cu ta inscribi den un estudio. “Nos trabou ta mas amplio. Nos tin henter e poblacion di docente cu ta rond di 800,” Richardson a splica. Den otro palabra, si tuma e cifra di 30 mil florin pa studiante ta un forma hopi limita di mira e realidad di IPA. “E no ta husto pa wak e asina. Berdad Universidad di Aruba tin mas studiante inscribi compara cu IPA. Nos tin un promedio di 200 y Universidad di Aruba tin entre 700 pa 800 promedio. E cantidad di nos studiantenan ta varia dependiendo di e tipo di programanan cu nos ta ofrece. Den caso di Universidad di Aruba, tin e facultadnan fiha y cu nan studiantenan.

“Den otro palabra, e Director General di IPA ta kere cu dificilmente por compara e dos institutonan cu otro, particularmente pasobra Universidad di Aruba no ta brinda recapacitacion constante pa profesionalnan, manera ta e caso cu IPA si mester haci. “Aña pasa so mester a haci uso di un website special pa por a brinda enseñansa digital na mas di 300 hende, cu ta cursonan certifica, manera 21st Century Teaching,” Richardson a bisa.

“Y no ta servicionan cu nos por cumpra di afo. Nos tin un Plan di Enseñansa di Aruba y pa esaki nos no por cumpra programa di afo. Nos mes mester traha nan a base di nos investigacionnan, y crea conocemento na nivel halto,” drs. Marisol Croes a splica. “Na momento cu mester crea cursonan nobo, ta personanan na Aruba mes di nivel universitario mester desaroya programanan pa docentenan di kleuter, scol basico y otro por haya nan recapacitacion.”

IPA ta desaroya su mesun cursonan

Tur ta programanan cu ta diferencia pasobra un docente di kleuter no ta haya e mesun curso cu e docente di scol basico. “E desaroyo cu mester tuma luga, pa cumpli cu e reto di pais Aruba tambe ta diferente. Mi tabata traha na Universidad tambe, unda mi por scoge algun buki gratis ‘online’ y saca algun capitulo pa e studiantenan, baha e paginanan y mi no mester a duna enseñansa contextualisa. Mi mester a duna enseñansa na nivel cientifico di cualkier otro pais na mundo. Esey ta rekeri hopi menos tempo na desaroyo di curso.”

Al contrario, na IPA mester inventa curso den cas, basa riba investigacion, colaboracion cu scolnan pa mira si e ideanan ta cuadra cu e realidad di enseñansa na Aruba. “Kiermen cu prome cu saca un curso digital grandi, manera tabata e caso aña pasa, a rekeri dos pa tres aña di preparacion continuo. Y esey no ta tuma na cuenta ora ta djis tuma e presupuesto y compar’e cu e cantidad di studiante registra na IPA.”

No por compara un instituto na Hulanda cu IPA

Ademas tin e seccion di investigacion cu ta haci trabou pa henter e campo di docente di Aruba. Tur e programanan cu IPA ta ofrece na studiante y e campo di docente ta contextualisa pa Aruba. No ta bukinan cu por djis cumpra di afo, pero ta material cu mester keda desaroya pa esnan di IPA pa cumpli cu e necesidad di Aruba, a sigui splica.

Director General Marilyn Richardson: “Pues si ta tuma e cifra di docente di IPA riba cada studiante inscribi aki, ta laga afo tur e otro trabounan aki cu IPA ta haci. Compara trabou di Universidad di Aruba cu esun di IPA ta manera compara appel cu peer.”

Di su banda Berthson Boekhoudt a splica cu mesun cos ta conta pa e programa pa e estudio na IPA mes. “Si tuma e ehempel di Hulanda, eynan tin un of dos persona ta desaroya tur programa y ta djis duna e programa na e docente di un instituto PABO (pedagogische academie voor het basisonderwijs), cu e ora ey ta bay duna instruccion na studiantenan. Y na Hulanda tin diferente instituto PABO.”

Na IPA ta e mesun docente di IPA mester desaroya e programa, ademas di instrui esaki na studiantenan. “E ta diferente cu cualkier otro pais, unda tin mas klas. Un hende pa desaroya programa y diferente instituto ta ricibi esaki.”

PABO Online

E mesun cos ta conta pa e Pabo Online cu Minister Lampe a brinda como opcion na studiantenan di Aruba. Marisol Croes tabata den e combersacionnan pa e Pabo Online hunto cu Director di Scol Publico Nora Eleonora, unda e idea inicial tabata pa crea ‘Mi Pabo,’ un palabra na Papiamento pa un programa na Hulandes. “E tempo ey e intencion tabata pa mira con e instituto na Hulanda por sostene nos como IPA, pa bira uno digitalisa. Nunca e idea tabata pa manda studiante directamente pa e instituto digitalisa.”

Tanto Croes como Boekhoudt tabatin contacto directo cu e instituto keriendo cu e intencion ta pa un colaboracion. Ademas, ambos ehecutivo di IPA tabata kier a reuni directamente cu e instituto na Hulanda pa haya sa con nan ta implementa e parti practico di duna les. “Studiantenan mester haya e practica con pa para dilanti klas y nos tabata kier sa con ta logra esaki ‘online,’” Croes a bisa.

Pero te eynan e combersacionnan a yega y awor tin siete studiante inscribi na e Pabo Online, algo cu ta bay contra e Plan di Enseñansa Nacional. “Meta di IPA tambe ta basa riba e plan nacional, saliendo for di e idea cu mester crea un curiculo rond di e contexto di e mucha, den su lenga materno. Nos kier sa con e instituto na Hulanda lo ofrece esaki. Pasobra nan a bisa nos cu nan no conoce e contexto di Aruba, no conoce Papiamento,” Marisol Croes a splica.

E por compronde cu kizas esnan cu a inscribi e Pabo Online no ta interesa pa traha na Aruba, pasobra realidad ta cu no ta na Aruba so, pero na Hulanda tambe mester di maestro. “Y tin condicionnan laboral na Hulanda cu nos no por competi cune. Esun di nos ta hopi anticua. E condicionnan laboral na Hulanda ta keda eleva constantemente pa haci esaki mas atractivo. Cualkier hende na Hulanda cu no kier sigui den sector priva, por solicita, haya guia personalisa pa e por bira maestro. Nos no tin e modalidad, e placa pa haci e inversion ey. Nos poblacion mayoria biaha ta hendenan cu ta mira e profesion di docente como un di dos oportunidad, ta hendenan cu tin yiu. No tur ora e profesion di bira docente ta nan prome escogencia, pasobra na Aruba tambe tin limitacion di profesion. Kiermen nos ta den un situacion diferente.”

(Ta continua riba pagina 7).