Recientemente, Bon Dia Aruba a publica un articulo riba e obstaculonan cu comerciantenan local tin pa bende nan servicio y productonan online pa motibo cu no tin e facilidad di ricibi pago via PayPal na Aruba. Un di e banconan comercial mas grandi na Aruba, Aruba Bank, a comenta riba esaki indicando cu tin algun opcion pa comerciantenan por surpasa e obstaculonan aki.
“Pa por haci uso di PayPal e plataforma mester registra su mes na Banco Central di Aruba pa un banking financial license”, manager di marketing y relacionista di Aruba Bank, Tamara Waldron, a comenta. “Otro aspecto cu kisas ta importante pa PayPal mes ta si e mercado ta suficiente grandi (volumen di transaccion) y e profitability pa e compania.”
Contestando si clientenan di Aruba Bank a haci algun solicitud, el a bisa cu ‘Aruba Bank no ta registra cantidad halto di peticion pa ricibi pago via PayPal. E necesidad entre “merchants” [bendedornan] ta mas bien pa ricibi pago online via un website /pa por acepta pagonan cu credit card/debit card.”
Y pa haci esaki, e banco ta duna e siguiente opcion. “Aruba Bank ta ofrece su clientenan e plataforma pa ricibi pago online, nos eCommerce Solution. Por haya mas informacion aki: https://www.arubabank.com/Corporate/Banking/Business-Services/Ecommerce-Solution. Por mira e video aki: https://youtu.be/_SlwiXjcsbo”, Waldron a indica.
El a indica cu mediante e sistema aki, ‘e Merchants por opta pa semper pa ricibi pago cu credit card y debit card online. E beneficio nan ta cu e merchant ta “open for business” 24/7 y cu e posibilidad pa duna mas servicio cu vs un negoshi di “brick and mortar” tradicional.”
Industria creativo ta keda afo?
Esaki en principio ta brinda un bon opcion pa empresanan chikito cu kier bende nan productonan online y ricibi pago directo via credit- of debit card. Sinembargo, un di e puntonan principal pakico tin necesidad di PayPal na Aruba ta pa motibo cu e plataforma aki specificamente ta esun acopla na websitenan popular, manera Spotify y Youtube, cu ta esunnan cu ta beneficia e industrianan creativo, manera artista musical y di cine.
“E problema grandi cu artistanan na Aruba tin actualmente ta cu nan no por bende nan musica online, riba e plataformanan”, Edward Erasmus, managing director di Free Zone Aruba a bisa den un entrevista cu Bon Dia Aruba publica den nos edicion di diahuebs ultimo. “Djis pensa YouTube, Spotify, of cualkier tipo di plataforma asina, cu ta traha cu PayPal, dus cu lo por funciona si bo tin PayPal. Dus tin yen diferente tipo di otro gateways posibel cu por pega na bo website, pero bo no por usa e sistemanan aki riba plataformanan cu ta mas renombra, plataformanan general unda por bende bo producto – musica, video, buki. Dus bo no por haya bo pago.”
Segun Erasmus, ta net unda e artistanan kier bende nan producto, net eynan no tin e facilidad pa haya nan pago.
Bon Dia Aruba a tuma contacto cu Banco Central di Aruba pero no a ricibi un contesta inmediato.
