Segun resumen di ayera di Departamento di Salubridad Publico DVG riba e desaroyonan di pandemia di Covid-19 na Aruba, lamentablemente ayera tabatin dos morto mas, ambos residente, vincula na e malesa causa pa e virus SARS-CoV-2.

DVG a informa cu ademas di e dos residente, tambe un turista a fayece, y nan edad ta varia entre 63 y 65 aña, y ningun tabata vacuna. E total di fayecido awo ta 124.

Ademas, den su resumen di ayera DVG a informa cu 114 persona a recupera. A registra un total di 97 caso nobo di Covid-19, di cual uno ta turista y 96 ta residente. E cifranan aki ta representa un tasa di positividad (‘positivity rate’ di 26 porciento. E cantidad di caso activo ayera tabata 1057.

Datonan di DVG riba Covid-19 ta ilustra un aumento di casonan nobo, cu un averahe semanal di 105 caso pa dia, y un averahe di tasa di positividad semanal di 27 porciento pa dia.

Actualmente tin 70 persona interna cu Covid. Di esakinan, 13 ta den Unidad di Cuido Intensivo na Colombia. E resto ta hospitalisa na Hospital Dr. Horacio Oduber, di cual 8 ta den Unidad di Cuido Intensivo, 47 ta riba piso general, y dos riba piso di maternidad.

Vacunacion
 Mientras tanto, Departamento di Salubridad Publico ta continua curashando tur ciudadano cu ta bin na remarca pa vacuna. “E vacuna contra COVID-19 ta wordo recomenda pa tur persona di 12 aña bay ariba (sin conta e individuonan cu a wordo desaconseha pa nan dokter pa tuma e vacuna), incluyendo tur esnan cu ta na estado, dunando pecho of purbando di sali na estado”, DVG a informa. “Hende muhe na estado of cu tabata na estado recien tin mas probabilidad di bira malo gravemente si ta contagia cu COVID-19, den comparacion cu hende muhe cu no ta na estado. Vacuna contra COVID-19 por proteha e grupo aki di un malesa serio ocasiona pa COVID-19.”

“Vacuna no ta solamente un acto di solidaridad y reponsabilidad conhunto caminda niun hende por keda atras; pero mas tanto, vacuna ta un acto di amor pa bo mes, bo famia y bo pais! Participa den nos VacunaTHON, dia 22 di Augustus awo na Ritz Carlton for di 9am te cu 4pm. Por fabor, no duda mas: VACUNA!”, DVG a finalisa.