Ta bay forma gobierno…! Esey nos sa caba…

Nos lo tin un acuerdo di gobernacion; esey en esencia tabata e mensahe di e firmamento di acuerdo entre e dos partidonan, cu pa algun tempo a sinta cu un serie impresionante di ‘stakeholder’ (mas di 100). Nos por ta sigur anto cu esnan cu no a haya cita cu Informador, alavez promer ministro demisionario, lo ta pasobra nan no ta desea papia, o pasobra ta considera nan realmente irelevante. Como cu awor no mas lo mester yega na ordena tur loke a bin dilanti den tur e conversacionnan aki, pa di esey destila maneho pa e diferente ministerionan, esaki ta tuma tempo. Den e sentido aki e firmamento di antayera nochi ta mustra bastante ‘irelevante’ pasobra e no ta añadi nada na loke nos tabata sa caba. Tur esaki no ta parce nada mas cu ‘PR’ pa duna esnan cu ta birando impaciente un tiki alivio. Nos no ta bisa cu mester rush e asunto, pa despues den gobierno bin topa cu yen di asunto cu bien por a discuti mihor di antemano. Pero nos no ta bisa tampoco cu mester keda rek e asunto innecesariamente, pesey tin demasiado asunto cu ta wardando, impacientemente o hasta cu urgencia, riba un gobierno nobo.

Un ehemplo di esaki nos por a lesa den e entrevista cu Bon Dia Aruba a publica ayera cu e director di tanto SVb como AZV, cu ta indica cu tin varios asunto pa resolve den cuadro di e medidanan cu mester tuma, relaciona cu e austerisacion den cuido medico cu a palabra cu Hulanda. Su persona como director no ta autoriza pa introduci cierto medida, cu ta exigi cambio di ley (di e.o. AZV). Esaki ta trabao pa gobierno y parlamento nobo, y si mester medida tuma pa inicio di otro aña, y no tin ainda un preparacion huridico na caminda caba, ta bay bira hopi dificil pa pasa e cambionan di ley aki promer cu fin di aña. Mira di e banda aki ta di spera cu gobierno, cu pa un gran parti ta e mesun cu a drenta na 2017, lo mester ta preparando cierto legislacion pa basta tempo caba. Y hunto cu e legislacion ta bin cierto investigacion pa bo tin un idea di e alcance di un medida. Por ehemplo: si ta introduci un ‘eigen bijdrage’, algo cu segun nos ta practicamente un hecho caba, lo mester studia su efecto y beneficio, pa sa kico nos ta haya si introduci esaki. Den e entrevista cu e director di AZV e ta menciona tambe cu, si mester introduci e contribucion individual aki, lo mester tuma medida pa ‘socialisa’ esaki pa esnan di menos recurso. Sigur den e crisis cu nos ta aden, e no a pasa ainda, esey ta nada mas cu sentido comun.

Tin otro efecto di e tardanza pa yega na un gabinete, algo menos faborable, y esey ta cu ta bira dificil pa tin un presupuesto entrega y trata promer cu mitar di december. Probablemente e proceso aki por conoce varios luna di retraso cu por pone tratamento na algun momento den otro aña atrobe. Aki tambe no ta conoci con leu e preparacion pa presupuesto 2022 tabata caba, pero en todo caso e diferente ministerionan, segun cu nan composicion ta varia di e ultimo gabinete, lo tin mas, o den cierto caso, menos problema cu preparacion. E anuncio sin embargo durante e presentacion di e acuerdo e siman aki, cu e ministronan lo haya te fin di october pa duna contenido di nan ministerio, ta duna di pensa cu no ta bay logra entrega presupuesto na parlamento pa fin di aña. Esaki tumando na cuenta tambe e proceso di conseho di tanto Raad van Advies como CAft. Tambe ta keda e punto cu eventual plannan nobo, cu no tabata contempla anteriormente, cu por surgi di e negociacion entre e partidonan. Esaki lo por ta un asunto cu ta causa retraso pa fiha e costonan di e proyectonan ey. Di otro banda, no mester spera tanto cos nobo tampoco, pasobra lo no tin espacio financiero.Ta keda e punto cu gran mayoria di gasto di gobierno ta gasto fiho, pa gran parti mara na e asuntonan mas importante, cu ta gasto di personal, bienes & servicio, y pago di interes riba prestamo. Loke ta keda na recurso pa por ehemplo stimula economia no ta tanto. Ta mira den e presupuesto 2021 cu tin fondo pa ‘inversion, transmision local di fondo y credito local’ cu pa 2021 ta considerable, pero menos cu na 2020. Cu nos pais den pleno segundo parti di aña caba, lo ta interesante pa sa kico lo por tin pa estimulo di economia pa 2022.

Pero banda di e inversion modesto cu gobierno por haci, vista ta keda fiha riba sector priva. Gran parti di inversion nobo mester bin di e banda ey, y den e sentido aki ta importante pa sa kico ta loke gobierno por ofrece na medida pa facilita haci negoshi. E cambionan di ley laboral ta parce un tema interesante, pero no ta dicta ritmo di inversion. Nos ta haya inversion si tin proyecto factible y rentable pa inicia. E ora ley laboral mas flexible por ta un extra incentivo. Y ta den e sector aki cu no ta mira mas cu algun hotel nobo, cu nan bon y nan malo.