Mester bin cambio di ley y reformulacion di cuido di prome liña pa asina por realisa tanto e reduccion di gasto di AZV pero tambe percura cu ta keda duna servicio medico di calidad, teniendo na cuenta cu e fondonan lo ta limita.

E discusionnan riba reduccion di cinco miyon florin di gasto di AZV tur luna a yega na un punto cu mester di Gobierno y Parlamento. Asina Director Interino di AZV ir. Edwin Jacobs a bisa Bon Dia Aruba. “Nos ta den e fase, cu decisionnan cu mester tuma luga. tin cu pasa via ley.”

Awor aki ta pendiente pa Gobierno forma, pasobra te cu awor ta trahando cu un Gobierno demisionario cu no por tuma decisionnan politico grandi. Tin varios asunto cu mester keda concretisa cu ta entre otro e lista positivo di remedi. “Prome Minister a pidi pa socialisa esaki, y mester atende cu e punto aki ainda,” Jacobs a bisa. “Tambe tin e introduccion di contribucion propio, cu tambe mester ta socialisa.”

Dokter di cas

Pero tambe mester bin discusionnan riba e pakete basico di AZV, sea ta mantene of ta bay haci’e mas chikito. “Sea ta saca cierto cuido afo of ta limit’e. Tur ta decisionnan cu ta cay na nivel di Gobierno y mester pasa sea pa medio di landsbesluit of landsverordening.”

E decision di corta gasto di AZV structuralmente a trece hopi consternacion pa dunadonan di cuido, entre otro dokternan di caso. Hopi a bisa cu e recorte aki tabatin efecto negativo riba operacion di nan practica y na final, na e calidad di cuido cu nan por brinda.

Consecuentemente, a tende di varios dokter di cas cu a dicidi pa stop. Segun Director Interino di AZV, tin como seis dokter di cas cu berdad a stop, pero algun ta pa motibo cu nan a yega edad di pensioen.

“Tin di nan a coopera pa keda traha un poco mas, pa yuda atende e presion di trabao. Otronan a entrega nan retiro, pero no necesariamente pa motibo di locual nan ta ricibi pa compensacion. Pero tambe tin otro cu a dicidi pa stop pasobra nan ta haya cu nan no ta haya e compensacion adecuado. E berdad ta cu e sector ey tin hopi aña sin conoce adaptacion di tarifa. Y tur dos banda tin nan parti den esaki. E no ta keda unicamente na AZV,” Edwin Jacobs a conta. “Problema ta si cu a surgi un problema excepcional pa motibo di COVID-19. E crisis actual no ta hustifica ningun tipo di adaptacion (aumento) di tarifa pa ningun dunado di cuido.”

Reformulacion di servicio

Pa loke ta e dokter di cas cu ta e cuido di prome liña, ta bay formula un plan kico ta bay ta e necesidad di cuido pa e proximo 15 a 20 añanan. Segun Jacobs, e ta nifica fortificacion di e prome liña di cuido y cu hopi trabao cu ta pasa pa e di dos liña cu ta specialistanan, mester keda atendi cerca e dokternan di cas. “Mester bisa si cu den tempo, AZV a coopera hopi pa baha presion riba e prome liña door di financia e asina yama ‘praktijkondersteuners,’ cu a alivia man di e dokternan di cas.”

E Praktijkondersteuners ta esnan cu ta atende cu e pacientnan cu malesa cronico. Esey tabata un contribucion cu a duna pa baha e presion di trabao di e dunadonan di cuido di prome liña. “Nos tin comprension si pa locual e asociacion di dokternan di cas, HAVA ta trece dilanti. Pero tambe nos mester tene cuenta cu e situacion financiero di pais y e palabracionnan cu a haci cu Hulanda pa baha e gastonan di AZV. Pero si ta mira necesidad pa reformula henter e sector di cuido cu ta bay tuma tempo, pa ta prepara adecuadamente pa e demanda di cuido cu ta bay tin mester den e proximo añanan. Nos sa cu e demanda pa cuido ta bay aumenta, pero cu e cantidad di florin disponibel no ta bay ta mes hopi cu aumento di e demanda. Esey ta nifica cu nos mester ta bay ta creativo y pensa ‘out of the box,’ pa percura cu e mesun florin rindi un poco mas na servicio di cuido pa nos aseguradonan. Si no, nos no lo por bay atende e reto grandi nos dilanti cu enbehecimento y malesanan cronico ta impone riba nos.”