Mientras e cifranan di vacunacion ta sigui subi na Aruba, e cifra di esnan no-vacuna ta sigui baha. Data ta ilustra cu a pesar cu e grupo di localnan no vacuna ta representa solamente 29% di e poblacion 18+, toch nos ta mira cu e grupo aki ta representa 82%, 87% y 77% di hospitalisacion, ICU y morto, respectativamente, pa motibo di Covid-19 severo desde e comienso di e di 4 ola (despues di 1 juli).

Aruba su poblacion ta consisti di un poblacion di ≈125 mil ciudadano teniendo na cuenta cu e grupo di esnan indocumenta. Na e momentonan aki na Aruba ≈58 mil ciudadano registra na Aruba entre edad di 18 aña bai ariba a vacuna cu tur dos shot, grupo di esnan cu ta ariba di 18 aña cu no a vacuna ta ≈23 mil. Si tuma nota, e grupo di esnan vacuna ta casi 3 biaha mas grandi cu e grupo no vacuna.  E informacion aki ta uno hopi importante cu no por descarta ora di analisa cifranannan di COVID como cu e populacion na Aruba di esnan vacuna vs esnan no-vacuna no ta igual dus no ta 50/50.

Na Aruba for di 1 di juli 2021 nos a conoce un aumento di 2238 caso positivo di COVID-19 bao di residente di Aruba cu AZV. E cifranan aki ta consisti di 783 caso nobo bao di e grupo vacuna y 1345 bao e grupo no-vacuna. Manera por observa a pesar cu e grupo di esnan vacuna ta 3x mas cu esnan no-vacuna, asina mes e cantidad di contagio bao di e grupo di esnan vacuna ta menos cu di e grupo no-vacuna.

Pa locual ta cifranan di esnan cu a wordo interna den hospital por señala cu desde 1 di juli un total di 116 persona (18+ local) a wordo interna den hospital. Di esnan interna 21 tawata tin 1 of mas vacuna y 94 no tawata vacuna. Esaki ta traduci na un chens di 11 biaha mas grandi pa wordo interna na hospital pa motibo di Covid-19 si no ta vacuna. Di esnan interna cu mester a wordo interna den ICU, 2 tawata vacuna cu por lo menos 1 vacuna y 13 no tawata vacuna. Esaki ta traduci na un chens di 16 biaha mas grandi pa wordo interna den ICU pa motibo di Covid-19 si no ta vacuna.

Lamentablemente 14, di cual 13 ta local, persona a fayece desde 1 di juli di cual 3 tawata vacuna y 10 no tawata vacuna. Esaki ta nifica cu e chens pa muri dor di Covid-19 ta 8 biaha mas grandi pa esnan no vacuna.

Na Aruba, pa motibo cu nos ta biba poblacion mas chikito y cu nos ta na comienso di e 4 wave di Covid-19 na Aruba, e number nan aki por cambia. Pero, si ta observa e number nan aki den exterior, ta mustra cu e vacuna Pfizer ta hopi efectivo den preveni Covid-19 severo.

Esaki ta un bista di e cifranannan di COVID na Aruba den e ultimo luna y con esaki ta dividi entre e categorianan di esnan vacuna y esnan no-vacuna. Conclusion: Esnan vacuna di edad halto of cu ta sobrepeso of tin malesanan cronico, mester keda hopi cuateloso pa evita di contrae e virus. E vacuna ta proteha, pero malesanan cronico, sobrepeso y edad halto ta forma un riesgo extra cu por complica salud di un persona cu ta vacuna. Esnan no vacuna mester cuida nan mes mas hopi ainda ya cu nan ta representa e porcentahe mas halto di esnan hospitalisa y cu ta fayece.