Despues di Covid…Problema di salud ta keda…

Ta inevitable dedica atencion na e actual crisis di Covid-19. Esey e ta, un crisis, si nos ta keda riba 1.000 caso activo pa dia pa mas tempo. Pa tur motibo existente, nos mester domina e situacion aki y bolbe na normalidad. Esey si, e normalidad nobo cu nos ta mantene pa mas di un aña caba y cu por lo pronto lo keda tambe; ban custumbra cu esey. Falta di vigilancia por haci cu esituacion aki por dispara den direccion di e punto maximo di aña pasa september, tempo cu nos tabatin toque de queda, tapaboca obligatorio tur caminda, tur hende ta laba man, tene distancia, etc. Ta di comprende cu ningun hende tin gana di bolbe na e situacion ey, pero e ora nos mester a comporta nos mes un poco diferente.

Bisando esaki nos ta tuma e riesgo di pone e responsabilidad completamente cerca e ciudadano, y lubida cu no ta nos so individualmente ta carga responsabilidad. No por lubida cu basta tempo pasa, y relaciona cu eleccion, a kita practicamente tur medida, y ademas a tarda pa re-impone por lo menos cierto di nan pa preveni algo mas serio recientemente. Nos a hasta sinti e necesidad di publica un articulo cu e titulo “Gobierno a bay di vacacion, pero Covid no”. Esaki pa acentua e ausencia di autoridad tumando decision contundente pa para e proceso negativo tempran pa e no por escala mas. Despues e autoridadnan a cuminza move pero pa bisa cu nan actuacion ta duna e confianza y ta crea e ambiente cu a conduci na e exito di control riba e pandemia aña pasa, esey no ta e caso. Sin embargo, nos mester supone cu nan ta suficientemente na altura di e situacion y loke ta requeri pa yega na domina e situacion atrobe.

Sin embargo, e actual crisis ta trece otro aspecto na luz di dia, cu tabat’ey caba, pero a yega e momento pa discuti nan mas ampliamente, tambe pasobra nan ta relaciona cu maneho gubernamental, no solamente awor a corto plazo den e combatimento di e virus mes, sino mas a largo plazo, loke ta cay net bon awor cu ta yegando na un gobierno nobo, cu supuestamente un plan di gobernacion adecua. Manera nos por a scucha y lesa, mayoria di esnan cu ta den problema serio cu Covid ta hende no vacuna. Nos no ta bay dedica henter un sermon aki contra esnan no vacuna y pakico nan no a haci esey y kico nan lo ta pensa. Laga nos no lubida si cu tin un grupo sustancial cu no por vacuna pa motibo di complicacion cu esey lo duna, relaciona cu e condicion specifico cu nan tin cu ta haci vacunacion imposible. Esaki ta haci cu condena sin mas tur hende cu no ta vacuna, no ta e actitud corecto; puntra promer.

Importante ta cu e crisis aki mester a siña nos cu nos situacion general di salud no ta bon. Y esey no ta toca solamente e personanan di edad cu di mes ta acumula problema medico, sino hende di menos edad tambe. Hasta mucha a cuminza mustra presencia den e grupo cu tin problema di salud cronico y serio. Y di mes e condicion aki ta pone nan na riesgo, no pa Covid so, sino pa tur otro peligro di salud. Despues cu Covid-19 lo ta poco mas cu un mal soño, un pesadiya cu nos mester a soporta, nos ta keda hinca cu e problema basico, cu no ta kita cu aplicacion di ningun sorto di vacuna. Loke aparentemente no ta penetra den mente di hopi hende ta cu nos situacion di salud ta bay mehora solamente cu un cambio radical, profundo y a largo plazo di nos manera di biba y come. Nos ta tende algun hende comenta cu “nos mester haci mas na prevencion”. Nos ta contento cu nan a expresa e palabra clave, pero realmente nos ta comprende loke esaki ta implica pa di berdad tin efecto? Puntra esnan cu ta traha riba tereno di guia di hende cu kier, o ta obliga pa custumbra cu un bida mas saludable, cu mas ehercicio, y principalmente menos y mihor alimentacion. “Ay no, ami si no por sin mi pastechi…,” ta loke un di nan a yega di tende. Esaki no ta un problema individual so, nos ta landa den un cultura unda papia di politica y di cuminda ta e topiconan mas importante. Y nos no ta bisa cu nos mester stop di papia di nan, pasobra papia politica, na bon manera, por haci nos mas involucra y mas consciente ta con ta dirigi nos pais. Y papia di cuminda tambe por keda, pero ban mand’e den direccion di cos saludable y agradable pa come. No ta berdad cu e cuminda mas sabroso ta esun mas dañino, y esun saludable no ta smaak nada; esey ta e pretexto di esnan cu no kier cambia y ta prefera pasa den tur e problemanan di salud, di operacion grandi, di perdida di pia como pacient diabetico, di operacion peligroso na curazon pa via di nan condicion. Si acaso nos asumi e actitud corecto pa ataca e problema tras di Covid aki, ainda ta warda nos un caminda largo pa remedia loke a daña den varios decada.