Manera por a anticipa, henter region di Caribe ta trahando duro riba nan recuperacion economico, cu pa practicamente tur teritorio ta implica recupera nan industria di turismo. Esaki ta conta tambe pa Aruba, unda recientemente mester a ahusta e grado di recuperacion pa motibo di e actual aumento serio di cantidad di caso di Covid-19, ademas di presencia fuerte di e variante delta. Unavez tin e situacion di salud bao control atrobe, por anticipa cu gradualmente turismo ta recupera, cu un grado creciente di ocupacion di e hotelnan existente.

Tur esaki no ta kita cu lo mester keda enfoca tambe riba futuro, unda pa Aruba tin planifica un aumento fuerte di camber di hotel y otro acomodacion, cu no ta ainda den e actual registro di acomodacion den operacion. Pa por tin un mihor idea di kico lo sucede mas a largo plazo den nos region y na Aruba mes, ta importante tuma na cuenta e tendencianan regional cu tabata existi promer cu e crisis di Covid-19 caba.

Por ehemplo, na januari 2020 Bon Dia Aruba a publica un articulo tocante e advertencia di Caribbean Tourism Organization (CTO) encuanto e desaroyo di cantidad di camber disponible y grado di ocupacion. Loke CTO a indica apenas algun luna promer cu e pandemia a salata nos tur, ta cu mientras e cantidad di bishitante na e region tabata aumentando, na 2019 entre 8 y 9 porciento, e grado di ocupacion tabatin tendencia di sigui baha.

Esaki mientras cu yegada di bishitante en general si a keda subi durante 2019 y Caribbean Tourism Organisation (CTO) su division di investigacion ta predeci un aumento di entre ocho y nuebe porciento den yegada di turista pa e aña completo. Tambe nos a relata cu e site Hospitality.net a calcula cu pa e proximo tres pa cinco aña tin mas di 100 proyecto di en total aproximadamente 27.300 camber den pipeline den e region.

Construccion actual di acomodacion turistico na Aruba, di varios mil camber, den e zona turistico di Palm Beach/Eagle y Sero Colorado, ta representa un parti desproporcional di e 27.000 cambernan ey, tumando na cuenta e ‘market share’ di nos isla den e mercado Caribense segun yegada di bishitante ‘stayover’, cu ta solamente 4-5%. Esaki sin tuma na cuenta e proyectonan cu eventualmente ta den preparacion, pero no a cuminza construccion ainda.

Mientras CTO na inicio di e aña aki a pronostica un mehoracion di 20% den yegada di bishitante pa nos region na 2021, despues di un caida general pa e region di 65%, por ta cu Aruba por presta mihor cu esey y drenta 2022 mihor prepara pa un recuperacion bon.

Sin embargo, esey no por haci cu ta ignora e tendencianan presente caba na 2019, cu tabata indica cu mester cuminza tene cuenta cu saturacion di mercado. Por ehemplo, na 2019 tabatin varios luna cu tabata indica un ocupacion menor cu mesun luna na 2018, y tambe lunanan di januari y februari 2020 tabata menos cu e aña anterior. Mientras – logicamente – atencion ta bay mas na recuperacion economico, den nos caso lidera pa recuperacion di turismo, lo no ta bon pa ignora e tendencianan mas general regional, sigur pasobra como teritorio chikito nos ta premira un aumento asina grandi di acomodacion compara cu e resto di e region. Y esaki sin considera ainda e aspectonan di importacion di forza laboral, aumento di demanda di infrastructura di educacion, vivienda, cu ta exigi inversion di comunidad, cu no ta calcula den e costonan cu desaroyo economico ta pone riba nos. Banda di e beneficionan di expansion ta sigur tempo pa mira e otro banda di e medaya tambe. Recuperacion ta importante, pero vigila peligro di saturacion ta un tarea mas importante ainda.

Leyenda pa potret: Construccion di St. Regis hotel na Palm Beach avansando.