Asina a informa minister demisionario di Turismo, Deporte y Salud Dangui Oduber durante un conferencia di prensa di ayera mainta na unda tambe a indica cu e situacion actual di Hospital Dr. Horacio Oduber ta uno preocupante.

El a trece dilanti e cifranan cu te ayera tabatin 70 persona interna den hospital, 9 den area di ICU di Aruba y 13 a wordo transporta pa Colombia, 46 ta riba piso general y dos riba piso di maternidad.

Tambe el a indica cu 38% di esunnan interna den hospital ta sufri di presion halto, 31% ta diabetico, 7% ta pashent di dialisis, 4% tin problemanan cu curason y 3% tin cancer. Banda di esaki, 28% ta pre-obeso y 42% ta obeso, loke ta nifica cu no ta personanan mucho saludabel segun Oduber a indica y cu lamentablemente a pesar cu e personanan aki ta vacuna, nan ta haya nan mes cu complicacionnan di salud y door di nan condicion fisico nan ta wordo interna na hospital.

Vacunathon diadomingo awor

Di mesun manera a wordo informa cu di tres ‘Vacunathon’ lo tuma luga diadomingo awor 22 di augustus na e ballroom di hotel Ritz Carlton for di 9or di mainta te 4or di atardi, esaki lo ta dirigi pa personanan riba 12 aña caminda cu Oduber a informa cu debi na situacion actual di Aruba nan a dicidi di pone e meta pa vacuna entre 2.000 cu 2.500 e dia aki.

Ta p’esey cu el a haci un apelacion pa esunnan mayor di 12 aña cu ainda no a haya e vacuna pa Covid-19 pa haci uso di e oportunidad aki ya cu nan no tin hopi localidad mas cu ta ofrece e vacuna Mericano, Pfizer.

Di su parti, DVG a remarca cu nan a bin cu e vacunathon aki pa motibo cu e demanda pa vacuna a subi pa via di aumento di casonan y fayecido pa Covid-19 a aumenta, DVG tin un capacidad di aproximadamente 400 persona cu nan por wordo vacuna pa dia pero ademas di esey nan ta mira cu e demanda a subi y nan kier preveni pa hende mester warda un tempo largo pa haya nan vacuna mirando e importancia cu esaki tin.

Tambe a trece dilanti cu personanan cu ta wardando pa un afspraak cu DVG pa haya e vacuna por acerca na hotel Ritz Carlton diadomingo awor y esunnan cu a haya nan prome shoot caba cu pa algun of otro motibo no a haya esun di dos shoot tambe por yega na e ballroom di e hotel aki diadomingo. E sistema lo ta ‘Walk in’ loke ta nifica cu nan no lo traha cu afspraak e dia aki.

E grado di vacunacion cu Aruba tin na e momentonan aki ta di 63% di e poblacion di 18 aña bay ariba y e 60% a haya su di dos shoot caba pero esey no ta suficiente pa por logra e meta segun a wordo menciona pa asina yega na 85% cu ta e meta final. Poblacion di entre 12 pa 18 aña a wordo vacuna te un 33% loke ta nifica un cifra basta abao.