Presupuesto suplementario 2015 mester bay prome cu aña caba
E asunto di presupuesto ta birando un novela completo atrobe. Banda di presupuesto 2016 cu tin tardanza, a surgi awor e problema di e presupuesto suplementario 2015 cu tambe mester trata den pura. Esey no mester tabata un problema, pero el a bira uno pasobra gobierno ta laat atrobe pa entrega e documentonan pa nan cana nan caminda. Y e caminda formal a bira mas largo, awor cu CAFT ta un realidad y mester keda inclui den e proceso prome cu e presupuesto yega Parlamento pa aprobacion. Kico esaki ta significa den tempo efectivo adicional cu mester tuma na cuenta?
Basicamente e proceso di duna conseho riba presupuesto suplementario ta mescos cu pa e presupuesto ordinario. Esey ta implica cu, prome cu e documento por bay pa Raad van Advies duna su conseho, mester manda esey pa CAFT, cu mester duna contesta dentro di 14 dia. E presupuesto, o presupuesto suplementario, ta bay pa Conseho Consultativo, pa preparacion di nan conseho. Despues, e documento ta bay pa gobierno, cu mester duna contesta riba loke Raad van Advies ta trece dilanti. Despues e pakete completo, cu rapport di CAFT, conseho di RvA, contesta di gobierno y e presupuesto mes ta bay pa Parlamento. Ora CAFT duna su opinion, gobierno ta obliga di pone den e Memorie van Toelichting con el a eventualmente tene cuenta cu loke CAFT a trece dilanti. Nos por a comprende cu e presupuesto suplementario a yega Raad van Advies, pero no tin conseho ainda di CAFT, y Raad van Advies mester di esaki pa haci nan trabao. Cu tur esaki den wega, ta dificil imagina cu tur cos ta cla prome cu fin di aña.
Mas interesante lo ta kico ta e contenido di e presupuesto suplementario; cuanto placa a gasta extra y eventualmente cuanto placa no a drenta caha di gobierno e aña aki? Manera nos a publica algun dia atras den e seccion aki, gobierno su cifranan di entrada na fin di september no ta mustra asina positivo. Banda di un caida di entrada cu no ta impuesto, cu a cuminsa aña pasa caba, e aña aki a mira pa prome biaha un caida den entrada di impuesto tambe. Kico realmente ta pasando aki? Mientras a conta cu un crecemento economico den turismo, cu lo a duna mas entrada na gobierno, nos ta mira en berdad cierto aumento den e sector aki, pero gobierno no ta mira beneficio di tur esaki den e impuestonan cu ta cobra.
Esey por ta un señal cu nos a yega na e ‘turning point’ den nos economia, unda probablemente mas medida lo genera menos entrada, y de paso haci daño bahando actividad economico mas ainda? Den e contexto aki nos por mustra tambe riba e encuesta periodico reciente di Banco Central (Business Perception Survey), cual encuesta pa di dos trimester di 2015 ta mustra un cambio grandi di optimismo modera entre empresario, pa un pesimismo bastante amplio. Sin bay den tur detaye, por bisa cu practicamente tur aspecto cu e encuesta aki ta cubri, ta mustra menos positivo compara cu e trimester anterior. E imagen duna pa e encuesta ta bin comproba loke varios entidad representante di empresario a expresa caba den curso di e aña aki.
E asunto mas importante awor no ta con pa cubri e deficit extra cu lo aparece den e presupuesto suplementario. Gobierno podise ta bay fia localmente algo extra, o di otro manera lo mester bende propiedad, edificio por ehemplo, aunke nos no por bisa cu esey ta un opcion confirma. Esaki ademas lo contribui na un ‘negatief vermogen’ mas grandi ainda, cu segun CAFT ta na 2,4 biyon na fin di 2014. Importante ta principalmente con pa atende e asunto aki den añanan venidero. Hasta e panorama menos faborabel cu CAFT ta pinta pa 2016, diripiente no ta ni yega cerca di e realidad cu ta apareciendo awor pa e aña aki, unda ni un cierto crecemento den turismo no ta scapa nos di un deterioro den financia publico.
Resumiendo, nos por bisa cu e presupuesto cu no ta sali na tempo, realmente awor ta e aspecto menos preocupante. E problema mayor ta un gobierno cu semper a mustra optimismo y tabata duna impresion cu nan tabata sa kico nan ta haci, aunke no necesariamente esey tabata berdad, aworaki ta mustra indeciso, anto na momento cu henter nacion ta gritando pa ‘haci algo, basta caba cu e incertidumbre aki’. Aparentemente no lo yega un fin na esaki, ya cu ta parce cu gobierno ta calculando di momento pa momento ki expresion den publico lo ta miho pa nan den luz di sobrevivencia politico, nada mas. Algun tempo pasa un empresario anonimo a bisa: “Si como gobierno bo mester scoge entre dos alternativa negativo, bo ta ‘damned if you, and damned if you don’t’, cu tur dos tin consecuencia politico desagradabel den siguiente eleccion, por lo menos scoge loke ta miho pa e pais.” Nos tin miedo cu e manera di pensa aki no a penetra ainda den seno di gobierno.
Publica den Bon Dia Aruba 28 november 2015
