Frendsel Giel, manager director di Aruba Investment Bank (AIB Bank): “Nos ta para pa apoya empresanan na Aruba, apoya iniciativanan y innovacion”

Reunion cu stakeholders y formado minister demisionario Evelyn Wever-Croes ta sigui tuma luga caminda cu ayera diaranson mainta Aruba Investment Bank (AIB Bank) a trece dilanti cu nan a papia riba un master plan pa entrepeneurs cu algun di nan a wordo afecta pa pandemia di Covid-19.

Frendsel Giel manager director a expresa cu nan a wordo invita pa un reunion cu formado pa asina desde nan perspectiva nan por duna un opinion di con nan ta wak situacionnan y tambe nan a duna un evaluacion di proyectonan cu ta andando y algun opcionnan cu por tin.

Den e reunion, Giel a menciona cu nan a enfoca riba dos topico cu ta den e master plan cu nan a traha aña pasa den cual AIB ta parti di dje, un di nan ta forma un fondo cu ta yama “Recovery Innovation Fonds” den cual AIB a pone enfasis y cu nan ta para pa embarca tras di e tarea aki.

Giel a remarca cu e plan aki no tin relacion cu e crisis cu pandemia di Covid-19 a crea, sino cu esaki ta algo pa apoya entrepreneurnan local, cu tambe ta yuda pa diversifica segun el a sigura y cu tin innovacion den dje, tambe ta dirigi pa haci di Aruba mas resiliente y cu nan tin cu cuminsa cu empresanan chikito pa asina nan por duna apoyo na nan.

“Nos a cuminsa papia di dje, nos a bisa cu e siguiente biaha cu e minister lo wordo nombra lo por papia mas amplio riba con por institui un fondo asina aki pa apoya empresanan na Aruba, apoya iniciativanan, innovacion y tambe apoya e maneranan con nos por yuda nos personanan local pa nan cuminsa nan negoshi”, Giel a declara.

Di esaki, el a bisa cu nan ta papiando di diferente empresanan y cu e iniciativa mester ta pa entrepeneurs “nan lo tin ideanan cu ta innovativo, pero tambe nan lo mira con por recupera, pasobra den pandemia algun di nan a haya basta sla y kisas hopi di nan lo mester sea apoyo, conseho of apoyo financiero”, el a expresa.

Asina mes, el a comenta cu entrepreneurnan semper ta bisa cu nan apoyo ta hopi limita y den e caso aki nan a mira cu den e master plan ta poni y cu nan como AIB ta forma parti di e posibel ekipo cu mester wordo forma ainda pa cuminsa, no ta riba nan so sino cu ta un rol cu a wordo poni pa AIB tambe.

Hunto di esaki, tambe nan a papia riba con por yuda inversionistanan local di diferente forma, na unda esunnan cu ta dispuesto pa inverti y kisas otronan cu ta haya pa logra proyectonan na Aruba pa haci cu tur e mayoria di fondonan lo keda na Aruba.

E tarea di AIB segun Giel a manifesta ta cu nan tin un mision social economico para den nan statuutnan y nan intencion ta pa cumpli cu esey.