Actualmente tin hopi discusion rond di diversificacion di nos economia y recuperacion economico despues di e pandemia. Pero loke ta crucial den esaki ta cu mester desaroya maneranan pa haya divisa na Aruba, y den esaki tin cantidad di obstaculo. Un di nan ta e hecho cu na Aruba no por usa e plataforma popular di pago PayPal pa ricibi pago.

Bon Dia Aruba a combersa cu Edward Erasmus, Head of Operations di Free Zone Aruba, kende tabata personalmente involucra den e intento pa haci posibel pa por usa PayPal na Aruba pa ricibi pago.

“Casi dies, diesun aña atras, den mi ramo di trabao diferente cliente ta solicita con pa regel esaki”, Erasmus a conta. “E problema aki ta existi di hopi tempo caba. Si bo kier bende algo online, riba internet, e prome cos cu bo ta regel ta con bo ta haya bo pago. E tempo aya nos a ripara caba cu hopi hende tabatin problema cu esey, anto nos a busca contacto, mi mes a busca contacto cu PayPal.” Despues di un tempo a haya reaccion di PayPal, cu e tempo aya tabata desaroyando den Caribe. “E director regional di Caribe y Latino America a duna su reaccion y bisa cu nan tabata interesa pa haci Aruba tambe un pais cu ta ricibi pago.”

PayPal ta un plataforma di pago sigur, unda por traha un cuenta pa haci pago door di registra bo credit card. Tambe por usa e plataforma pa ricibi pago. Hopi website ta haci uso di PayPal pasobra e tin caracteristicanan di seguridad adicional. Por ehemplo den caso cu tin disputa, por ehemplo cu un persona su credit card a wordo usa sin autorisacion, PayPal tin un departamento pa investiga y trata esaki, a diferencia di otro sistema di pago.

Pero na Aruba no tin e facilidad pa usa PayPal pa ricibi pago.

“E tempo aya, mi ta papiando di 2010, PayPal tabata bezig cu otro paisnan den Caribe, entre otro St. Lucia cu tambe tabatin e mesun problema. Pues nan tabata dispuesto pa yuda haci esaki posibel”, Erasmus a splica. “A establece contacto, y na dado momento a yega na e punto unda nan ta puntra ken ta e autoridadnan cu mester duna autorisacion, pasobra anos no por dicidi riba nos mes; na momento cu ta hacie pa henter un pais, autoridadnan competente mester duna OK. E tempo eynan nos a combersa cu Banco Central y a introduci PayPal cerca nan tambe. Y locual cu mi por a compronde ta cu PayPal a manda nan condicionnan, dus nan contract, pa Aruba por yena e formularionan necesario pa hacie posibel pa usa PayPal pa ricibi pago na Aruba.”

Aruba no ta interesa?

Sinembargo pa algun tempo no a haya ningun update ni a mira ningun desaroyo. Pa sorpresa di Erasmus, e unico informacion cu nan a haya ta cu Aruba no a reacciona riba e contacto di PayPal y no a mustra interes. “Eynan cos a para of a tranca. Te cu dia di awe pa mi no ta duidelijk ainda kico precies ta e problema.” Despues cu Erasmus mes a tuma contacto cu e director regional pa haya informacion, a bis’e cu e compania ta haya e impresion cu sea Aruba no ta compronde con PayPal ta funciona, of no tin interes pa PayPal. Dus mientras PayPal ta keda disponibel, Aruba lo mester manda un solicitud serio na e compania pa nan por considera. “Hasta el a menciona si un delegacion bin bishita nan, haci e peticion, anto nan lo ta dispuesto pa regel esey. Mi mes por bisa cu mi a haci hopi intento pa gobierno tum’e na serio y haci e solicitud aki y mira con leu por yega. Pero ningun hende a tuma esaki na serio, ningun hende a regel esaki.” Y te dia di awe ricibi pago via PayPal no ta un posibilidad pa Aruba.

Bon Dia Aruba a puntra Erasmus si el a ricibi algun indicacion di e motibonan pakico e autoridadnan competente no a duna siguimento na e proceso. “Mi no a haya ningun indicacion. E unico cos cu mi por bisa ta cu durante añanan aki tin hopi desaroyo”, el a comenta. “Ban bisa Banco Central mes a introduci su mesun sistema di pago cu por facilita hasta e opcion aki. E unico cos ta cu e no ta funcionando ainda.” E no ta funciona cu e mesun facilidad cu PayPal, unda por djis habri un cuenta, mara esaki na bo credit card y haci pago.

Tin algun compania den region cu a purba di facilita e servicio aki ‘loke nos ta yama e payment gateway’, pero ningun cu a bira mesun popular of facil pa usa manera PayPal. “E payment gateway ta cu bo ta intermedia entre esun cu tin cu paga y esun cu tin cu ricibi e pago, anto bo ta crea sistemanan cu por transferi e placa e ora na un cuenta di banco. Pues mester tin diferente partido: e empresa cu ta bende, e cliente cu ta paga, y e banco – anto eynan tin e parti tecnico cu ta ricibi e placa y pas’e pa e banco.” Pero esakinan tin limitacion, pasobra PayPal ta un compania renombra mundialmente. “Si bo ta usa PayPal bo ta wordo mira como safe”, Erasmus a comenta.

Industria creativo
 E falta di acceso pa ricibi pago via PayPal na Aruba tin un impacto pisa riba e industrianan creativo, un di e areanan di ‘industria prometedor’ cu gobierno a destaca pa diversifica nos economia. “E problema grandi cu artistanan na Aruba tin actualmente ta cu nan no por bende nan musica online, riba e plataformanan”, segun Erasmus. “Djis pensa YouTube, Spotify, of cualkier tipo di plataforma asina, cu ta traha cu PayPal, dus cu lo por funciona si bo tin PayPal. Dus tin yen diferente tipo di otro gateways posibel cu por pega na bo website, pero bo no por usa e sistemanan aki riba plataformanan cu ta mas renombra, plataformanan general unda por bende bo producto – musica, video, buki. Dus bo no por haya bo pago.”

Segun Erasmus, ta net unda e artistanan kier bende nan producto, net eynan no tin e facilidad pa haya nan pago.

Falta di progreso
 Despues di mas di un decada desde cu PayPal a purba pone Aruba como pais cu por ricibi pago, no a mira mas progreso den e situacion. “Pa duna un ehempel, St. Lucia si a logra, nan si a logra pa nan companianan ricibi pago. Dus si Aruba e tempo aya a insisti y haci su best, nos tambe lo por ta mesun cos.” Pero ya tanto tempo a pasa, cu e persona cu ken Erasmus tabatin contacto no ta traha na e compania mas.

Mirando cu Aruba pa hopi tempo no a mustra interes, ta dificil pa pensa con serio PayPal ta tuma Aruba awo. “Nos mester mustra seriedad pa nan por duna nos e opcion.” E tempo aya, PayPal tabata creciendo den Caribe y nan tabata interesa, pero awo ta Aruba ta bay tin cu cana e caminda pa wak si ainda PayPal ta interesa. “PayPal no tin mester di nos.”

Companianan chikito ta particularmente afecta. Esaki pasobra segun Erasmus, companianan grandi tin e opcion di habri un cuenta di banco den exterior y vincula esaki na un cuenta di PayPal pa ricibi pago na otro pais. Pero companianan chikito no tin e opcion aki, y ta keda atras. “Esey ta lamentabel pasobra mi por bisa cu tin hopi potencial pa exporta, pero e sistema di pago no ta existi. Esey ta frustra hopi persona cu kier traha apps, cu kier bende nan musica, y cu kier exporta nan productonan. E problema mas grandi ta yega na momento di ricibi pago.”

Y asina ta keda tranca e avancenan di empresarionan cu lo por ta exportando nan talento y producto y treciendo divisa hopi necesario pa Aruba. “Bo por bende online anto bisa ‘haci un transferencia di banco’. Pero e cliente no ta bay gasta asina hopi placa pa haci e transferencia. Nan ta prefera un sistema cu di biaha por paga riba e website, pero nos no tine.”

Recuperacion Economico
 Durante pandemia, Erasmus mes a participa den duna conseho na gobierno riba maneranan pa recupera despues di e pandemia. “Esaki ta un di e issuesnan number un. Con bo ta regel e sistema di pago pa companianan chikito cu kier bende internet por haya nan pago. E no ta imposibel, pero e boluntad mester t’ey.” Un sistema pa ricibi pago manera PayPal lo habri un mercado internacional hopi mas grandi pa e empresarionan y artistanan di Aruba, loke por yuda recuperacion ecnomico. “Tin masha hopi industria cu por desaroya si nos tabatin e sistema aki. Tin training, musica, cultura, tur esey por bende online.” Segun Erasmus, ‘hopi idea ta muri si bo sa cu bo no por haya bo placa asina facil’.

“Esaki ta e bottleneck di mas grandi cu nos mester discuti”, Erasmus ta conclui.

Bon Dia Aruba a tuma contacto cu Banco Central di Aruba pa puntra kico tabata e motibonan cu Aruba no a mustra interes pa bira un pais cu por ricibi pago via PayPal, pero no a ricibi contesta inmediato.