Riba dia 16 di augustus ultimo, a tene un conferencia di prensa riba e reunionnan cu stakeholders riba formacion di e siguiente gobierno pa Aruba. E biaha aki, formador Evelyn Wever-Croes a reuni cu stakeholdernan den sector migracion, social y cultura. Durante e conferencia di prensa, Sra. Vicky Arens di Cas di Cultura a duna informacion riba e desaroyonan den e instituto aki.
Sra. Arens a cuminsa expresando su speransa cu maske el a papia hopi lihe durante e reunion, formador Wever-Croes y henter e delegacion por a compronde e proposito di Cas di Cultura, indicando cu actualmente a haci hopi trabao caba pero ainda ta bezig cu renobacion.
Cas di Cultura ta ‘e unico teatro prosenico na Aruba y den Caribe Hulandes’. “Nos ta spera cu den e termino aki por yuda nos. Principalmente habri porta, pasobra esey ta loke nos a pidi letterlijk, pa habri porta pa nos pa fondonan na Hulanda, Europeo, fondonan local, lotto, etc. pa nos por yega na fondo pa porfin nos por rebona”, Arens a comenta.
Arens a clarifica cu mientras nan ta wardando pa haya fondonan pa renobacion, si nan tabata bezig cu mantencion di e edificio pa esaki ‘no bay atras’. “Renobacion mes ta algo hopi mas detaya, mas profundo. No solamente ta renoba, sino ta pensa tambe riba e necesidadnan di comunidad pa cu un cas mas amplio, cu diariamente bo por haci algo na Cas di Cultura. Y no solamente esey. Ora bo crea un luga bo mester pensa riba explotatie tambe y ‘streams of income’. Tur esey nos a incorpora y pone den un plattegrond eigenlijk full otro.” Pues lo cambia e interior di e edificio, y lo mira algun cambio pafo.
Pa e renobacion, Arens a indica cu nan ta wardando pa fondo pero nan tin e plan cla caba, y tambe dentro di poco ta bay tin e suma defini. “Pasobra nos tabatin un suma caba dos aña pasa, pero ora Covid a dal nos den porta pa cuminsa cu recaudacion, nos a bisa cu nos ta bay haci e plan mas chikito”, el a splica. “Kiermen nos a reduci e plattegrond cu nos tabatin. Pero a zorg pa nos mantene e funcionalidadnan extra cu nos kier brinda na Cas di Cultura pa e ta un sala diario pa henter comunidad.”
Contestando si e idea tras di e renobacion ta pa modernisa e sala di Cas di Cultura, Arens a bisa: “Nos tecnicanan na Hulanda no lo wordo usa mas, y nos ta kere firmemente cu ora bo tin un situacion fresco, nobo, lo bo haya tambe e profesionalnan tambe cu ta desea di usa tambe un facilidad cu ta al dia. Pero tambe nos pueblo cultural, nos clientenan tambe ta anhela un situacion fresco y renoba.”
Pa loke ta trata e fondonan necesario pa e construccion, Arens a bisa cu nan ta trahando riba un mix di fondo, cu ta un parti di Hulanda, un parti di Aruba, ‘cu speransa un parti di fondonan Europeo, kisas di Monumenten Fonds’. Pues e ta bay ta un mix, y nan no ta descarta cu talbes ta bay hacie den fase, unda ta recauda fondo pa un parti, sigura pa esey avansa y despues ta recauda fondo pa otro parti. “Tur esey ta posibilidad cu nos ta explorando. Pero den e mix tin streams of income di varios fuente, di unda fondo por bin.”
