E situacion di COVID na Aruba no ta un situacion agradabel pa hopi hende. Cada ken cu e virus aki a bati na nan porta y cu a perde un famia ta sinti e dolor, uno mas cu otro cu no a haya e virus aki rond di nan.
Sinembargo na Aruba y rond mundo ta evolucionando. Belquis Moreu no ta un persona desconoci den nos comunidad, y e ta kere cu nos como hende mester cuminsa acepta cu cambio ta algo cu ta sucede continuamente.
Loke cu ta pasando globalmente y na Aruba ta cu nos como ser humano mester cuminsa cambia. Segun Belquis berdad cu e situacion di COVID a bolbe subi atrobe y ta na un cantidad cu nos no ta comodo cune, banda di esaki tambe a bin cu cierto medidanan cu nos tin cu nos mester tene nos mes na dje.
Den tipo di casonan asina aki segun Belquis abo como persona no por sinta bay preocupa bo mes riba mañan pero percura pa awe. Loke cu ta importante pa compronde ta hopi biaha nos mes como ser humano mester wak e situacion manera un oportunidad pa saca algo bon di dje.
Ta hopi importante pa cuminsa mira cu den obstaculo tin oportunidad y siña analisa di kico ta loke cu bida kier siña nos for di locual cu ta pasando. Nos como ciudadano mester cuminsa ripara cu e situacion di COVID ta mas cu un aña caba y tin algo cu nos tur tin cu siña.
Ta berdad cu tin algun hende cu ta gusta husga y apunta dede cu ta algo cu no ta positivo. Belquis ta recomenda cu nos tur mester stop di wak pafo y ban cuminsa wak paden di nos y pone como meta con ami como ciudadano por contribui pa locual cu Aruba ta pasando den dje.
Ta importante pa realisa cu e virus no a bin pa dies bay e kier haci un cambio y nos ta cambiando como ser humano. Ta importante pa acepta cu desde cu COVID a cuminsa hende y mayoria di nos a cuminsa reflexiona y para keto y puntra nos mes kico ta e nobo, unda nos ta bay cu e nobo.
Sin kita sin pone loke cu mundo ta evolucionando ta loke cu nos tin cu acepta y no tin pakico haya miedo of temor, pero nos tur mester cuminsa na surpasa e miedo y ban cuminsa saca afo for di e momentonan aki y cuminsa bay dilanti hunto.
Den e parti aki e les ta cu nos no por ta egoista mas. Sinembargo hopi hende ta pega na cos y hopi hende ta pega na hende, pero e realidad ta cu bo mester ta pega na bo mes. Segun Belquis e berdad ta cu hopi hende ta pega hopi duro na tur cos pero e les ta pa laga los di kico anos ta kere cu ta di mi.
Importante ta pa laga los y bay concentra riba locual cu tin paden di nos y di e otro persona cu tin contacto cune. Tambe ta importante pa tene cuenta di kico e otro hende ta sintiendo. E mundo a bira asina cruel cu nos ta sigui bay padilanti sin importa cu hende.
Mundo y sigur Aruba no ta mes un cos mas, cada ken mester traha riba nan mes y enfoca riba kico nan ta sinti y no kico bo ta pensa paso ta e curason ta importante y e cambio electrico magnetico di nos curason ta locual cu ta bay haci e diferencia.
Esaki ta un indicacion cu basicamente laga los di celebro ban na e curason y haci e curason limpi paso eyden nos ta warda tur cos. Awo ta e momento pa laga los di apego paso di e manera aki ta limitando nos mes y cada momento.
Importante pa cada un di nos cuminsa biba cu posibilidad nan cu tur cos ta posibel. Aunke cu tin hende tin miedo di e parti aki, pero loke cu ta un realidad ta eynan bida ta cuminsa y ta excitante y yen di oportunidad.
Hopi hende ta pensa y kere cu e situacion cu ta pasando na Aruba y na mundo ta pa malo, sinembargo esaki ta pa bon. Segun Belquis na momento cu nos siña e les di ta uni di traha hunto di kier bon pa un otro e unico resultado ta bay ta prosperidad.
Na momento cu compronde y acepta loke cu ta pasando e ta bay ta dicha, paz y prosperidad pa tur hende. Hopi di nos semper a biba ta pensa aden cu no tin suficiente y esey no ta berdad, tin un sin fin di posibilidad den cada momento y tin suficiente pa tur.
Stop di kere cu cosnan ta limita, cos ta caba, no tin suficiente cu ta un aspecto egoista individualista separatista mester stop, segun Belquis Moreu.
Importante ta pa cuminsa pensa cu tin suficiente espacio pa tur hende unda cu ami,abo y nos tur por progresa unda cu tin suficiente pa hende tin abundancia.
Den tur e aspectonan aki tambe ta importante pa redefini kico ta exito den bida. Exito kiermen paz interno, mi ta feliz, mi tin confiansa,mi ta sigur di mi mes, tin harmonia paden di mi y rond di mi y despues di tur esaki nan e material ta bin.
Importante ta cu e serhumano mester cuminsa di paden bay pafo y no di pafo bay paden. Na momento cu tin esaki bao di control automaticamente e energia ta bin y ta pone cu ami como persona ta esun cu ta determina kico un situacion ta bay haci ami sinti.
Den tur loke ta pasando actualmente cu e situacion di COVID ta bin cune su tras ta pasando den e proceso principalmente esunnan cu tin miedo cu ta sinti insigur y esunnan cu tin duda di futuro y si e situacion ta bay ta bon of e ta bira pio.
Loke cu ta importante ta pa nos biba e momento cu realmente ta e unico cos cu nos tin . E cantidad di personanan cu a fayece durante full un aña y mey, nos tin cu cuminsa balora cada momento. E berdad ta cu hende den su totalidad tabata biba pa biba, esaki no ta e manera di mas corecto nos tin cu siña biba hunto y cu ta e unico manera cu ta bay tin. E cambio ta con anos ta trata otro y con nos ta bibando. Realisa cu loke ta pasando ta pasando ta pa bon, pa nos ta significa hopi paso bida ta nos aliado y no ta un problema
