(ElNacional) – Den ultimo 8 aña a asesina na Venezuela mediante tortura 76 persona, segun informacion di Organisacion No Gubernamental (ONG) Provea den un informe reciente. E añanan cu mas morto pa tortura tabata 2013 (10), 2016 (14), 2018 (13) y 2019 (23). Na 2020 a denuncia 19 caso di tortura cu a inclui 97 victima individual.
Provea a señala cu aña pasa 858 ciudadano a sufri trato y castigo cruel, inhumano y degradante. Segun e organisacion ta trata di e segundo cifra mas halto di victima den e 8 aña cu Nicolas Maduro ta na poder. Aña 2018 a conoce mas, 970 persona afecta.
Provea a sigura tambe cu na 2020 tabatin 59 denuncia pa delito contra derecho di integridad personal y ta involucra 14 corporacion di seguridad, 4 entidad di administracion publico central y descentralisa y presunto agrupacionnan paramilitar.
Desde cu Maduro a asumi poder na 2013, el a acumula 36.842 victima di violacion contra integridad personal, 85,8% mas cu e total di victima registra pa Provea entre 1990 y 2012.
Provea a indica, ademas, cu na 2020 violacion di derecho di integridad personal tabatin dos foco principal: e aumento di menaza y trato cruel contra persona priva di nan libertad.
Directiva di e empresa estatal Siderurgica del Orinoco ta encabeza e lista di violacion di integridad personal, cu 1.000 caso di menaza y acoso contra trahador. Esaki ta representa 36,6% di e total registra na 2020. E hefenan empresarial ta sigui ehemplo di nan gobierno: menaza y acoso pa evita reclamo laboral.
Ministerio di Asunto Penitenciario a ocupa e segundo lugar cu 308 vctima. E personanan ey a ser someti na hamber y sufrimento pa enfermedad no atendi, y a sufri condicion no saludable cu ta constitui trato cruel. E Ministerio menciona bao control di Chavista Iris Varela, a encabeza e lista di caso cu 380 victima (35,8%).
