Despues cu durante weekend ultimo a registra 4 morto relaciona cu Covid-19, aumentando e total di fayecido den ultimo 30 dia na 10 persona, ayera Departamento di Salubridad Publico DVG lamentablemente a informa cu tabatin dos persona mas cu a fayece di e malesa.
Desde inicio di loke por considera como e di cuatro ola di contagio di Covid-19 na Aruba, cu por observa riba e grafica como iniciando dia 13 di juli 2021, a registra caba 14 fayecido pa Covid-19. DVG a informa cu e dos persona local cu a fayece ayera no tabata vacuna, y ambos tabata riba 75 aña di edad. Cu esaki, e total di fayecido na Aruba a aumenta na 121 persona.
Igualmente, den su resumen di ayera, DVG a informa cu 112 persona a recupera di Covid-19, e malesa causa pa e virus SARS-CoV-2. A registra un total di 56 caso nobo, di cual tres ta turista y 53 ta residente. E cifranan aki ta representa un tasa di positividad entre nos residentenan di 29 porciento.
E cantidad di caso activo ayera tabata 1026.
Segun DVG, datonan di Covid ta ilustra un aumento di caso nobo, cu un averahe semanal di 119 caso pa dia y un averahe di tasa di positividad semanal di 29 porciento pa dia.
Mientras tanto, na Hospital Dr. Horacio Oduber actualmente tin 59 persona interna pa ricibi tratamento adicional pa Covid-19. Di esakinan, 6 ta den Unidad di Cuido Intensivo ICU na Aruba, mientras 8 ta den Unidad di Cuido Intensivo ICU na Colombia. Ademas tin 41 persona isola riba piso general y uno riba piso di maternidad, es decir, un hende muhe na estado.
