Mas pensionado a fayece hasta prome cu dunamento di vacuna: Cifranan di mortalidad di 2021 berdad ta ilustra aumento, pero no ta splica motibo

SVB ta confirma e preocupacion di organisacion OPPA cu berdad na 2021, tabatin mas persona, particularmente pensionado cu a fayece compara cu e aña prome. Sinembargo, e cifranan riba nan mes no ta bisa mucho.

Asina Director di SVB, encarga tambe cu AZV, ir. Edwin Jacobs a bisa. “Cifranan ta indica cu 235 pensionado a fayece na Aruba durante e prome seis (6) lunanan di 2019. Na 2020, e cantidad tabata 274 y pa 2021, e cantidad tabata 341, cu ta un diferencia grandi.

Pero e aumentonan tabata na Januari, Februari, Maart, April y Mei. Na Juni, e cantidad di persona cu a fayece ta bao e cifra di 2020 y 2019 den e mesun periodo.”Si compara e siete (7) lunanan, na 2019 tabatin 281 pensionado cu a fayece, 304 na 2020, 371 na 2021,” Jacobs a cita e cifranan.

“Na Januari, Februari y Maart e cantidad di morto tabata relativamente halto. Na Februari tabatin 25 mas morto cu e mesun periodo un aña prome. Esey ta un diferencia grandi. Na Maart tabatin 10 morto mas cu e aña prome y na April tabatin 18 y na Mei a registra un diferencia grandi cu ta 19 persona mas cu a perde nan bida compara cu Mei 2020. Pero di otro banda, na Juni a registra 13 persona menos cu e cifra di fayecidonan na Juni 2020. Na Juli, tabatin un fayecido mas compara cu Juli 2020.”

En todo caso, e cantidad di persona relativamente halto cu a fayece en todo caso na Januari y Februari y comienzo di Maart no tabata pa motibo di vacuna, si considera cu e campana di vacunacion a cuminza na Maart.

Pero, segun Jacobs, e cifranan aki riba nan mes no ta duna e motibo pakico tabatin mas hende cu a fayece. Por ehempel na 2020 tabatin mas hende cu a 69 mas fayece compara cu 2019. E aña ey, esta 2019, a registra un cifra relativamente abao di fayecidonan, esta 495 hende cu a fayece. “Nos calculonan ta mustra cu e mester bay mas den direccion di 600, pero no a yega esey. E ta nifica si cu e cuido medico ta traha miho cu prome,” e Director di SVB, kende ta encarga tambe cu AZV a bisa.

E cifranan ta basa si riba datonan di Censo 2010, pero por sali afo cu expectativa di bida a aumenta, Jacobs a continua. “Y esey por lo general ta bin door di miho cuido medico.” Te ainda Censo 2020 no ta cla cu tur dato, pa SVB por adapta su tablo di mortalidad.