Clinicanan di salud mental ta purba forma parti di presupuesto di Biden

(AP) – Un programa innovativo pa yuda personanan cu problemanan di salud mental y abuso di substancianan ta ser considera pa un expansion grandi den bista cu e pandemia di COVID-19 ta empeora e luchanan cu uso di droga, depresion y ansiedad pa hopi Mericano.

Clinicanan di comunidad pa salud den comportamento ta ofrece servicionan 24/7 pa por ricibi hendenan cu ta cayendo den crisis y trece nan bek na stabilidad. Un di e tacticanan ta envolve e uso di conseheronan y terapistanan cu a biba y sobrevivi nan mesun trauma. Lansa den e administracion di Obama, e clinicanan aki a ricibi un expansion y actualisacion bao di president Donald Trump. Esaki no ta tipico pa un programa di salud di gobierno den temponan delica politicamente.

Aworaki, den bista cu Democratanan ta papia tocante e detayenan di con pa cumpli President Joe Biden su agenda domestico, algun di e personanan cu ta apyoa esaki ta mira e proposicion ‘mammoth’ como e miho vehiculo pa e expansion di e clinicanan aki. E costo cu ta premira ta cerca di 3 biyon dollar, cual no ta hopi den contexto di e presupuesto di 3.5 triyon dollar cu e senado a declara. Pero cu hopi otro prioridadnan tambe compitiendo pa un porcion di e placa aki, nada no ta garantisa.

“Mi ta bogando pa esaki ta parti di cualkier pakete di salud cu ta move den e senado,” Senador Debbie Stabenow, D-Mich a bisa. Su persona conhuntamente cu Senador Roy Blunt, R-Mo., a ser considera e padrino y madrina legislativo di e clinicanan aki, un colaboracion di añanan largo entre un liberal y un conservativo tradicional.

Esaki por ta nan momento. E pandemia di COVID-19 ta carga e culpa di un aumento di casi 30% den mortonan pa motibo di sobredosis aña pasa, y otro indicadornan tambe ta marca aumento den ansiedad y depresion. Adultonan hoben y adolescentenan tambe ta parti di e preocupacion.

“Claramente e impacto di e pandemia riba e pueblo su salud mental tabata significante,” Blunt a declara. “Si bo tabatin cualkier tipo di problema cu adiccion, e tabata hopi probabel cu esaki lo a empeora den bista cu bo ta hopi mas isola y tin hopi mas ansiedad. Den tur marcado di salud cu mi a mira, e cosnan ta bayendo den e direccion incorecto.

Blunt por ta den un posicion dificil politico si e proposicion ta parti e presupuesto di e Democratanan, haciendo e dificil pa ricibi e apoyo di e Republicanonan.

E programa aki su nomber oficial ta “Certified Community Behavioral Health Clinics” of tambe CCBHC den uso di gobierno. Mas di 400 ya ta operando den mas di 40 estado. Pero e programa te ainda no ta hopi conoci, y apoyo financiero di termino largo te ainda ta cuestionabel.

Stabenow y Blunt lo kier duna e estadonan e opcion di incorpora e clinicanan aki dentro di nan programanan di Medicaid, sigurando fondonan federal na un nivel mas halto.

“Finalmente nos ta poniendo calidad den luga, servicio comprensivo pa salud mental y addiction cu lo ricibi fondo den e mesun manera cu e servicionan di salud fisico,” Stabenow a expresa. E cas su Rep. Doris Matsui, D-Calif. ta e persona cu ta dirigi e plan y proposicion aki.