(WashingtonPost) – E cantidad di morto despues di e teremoto masivo na Haiti a alcansa 724, segun autoridadnan a bisa ayera, mientras oficialnan di gobierno a busca ayudo for di personal di emergencia Mericano.
Tormenta tropical Grace a ataca e pais cu yobidanan pisa pronostica pa awe, menasando pa complica e esfuersonan di rescate mas ainda.
Mientras Haitianonan a usa hermentnan simpel pa coba door di cas- y edificionan cu a collapse, USAIS a prepara pa lansa un team di buskeda y rescate di 59 miembro ayera for di Fairfax County, Virginia. Nacionnan Uni a adverti cu operacionnan di alivio tabata confrontando ‘restriccionnan’ pa motibo di e presencia di gangnan violento ‘strobando e capacidad di actornan humanitario pa opera normalmente y yega na e poblacionnan afecta’.
“Nos kier pa e [personal di emergencia Mericano] yuda”, segun embahador Haitiano na Merca, Bocchit Edmond, kende a bisa cu e tambe a solicita un team di buskeda y rescate for di Miami-Dade County. “Nos a haya noticia cu den algun parti di e pais tin probablemente hende bao di e escombronan y nos kier duna nan un chens.”
E teremoto di magnitud 7.2 riba escala di Richter a dal Haiti pa 8.29am diasabra. E tabata mas fuerte, maske a centra mas leu di e capital, cu e teremoto devastador na 2010 cu a cobra bida di mas di 220mil persona. Oficialnan y testigonan a bisa cu e areanan sur y occidental di e pais a sostene daño devastador.
Oficina di proteccion civil di Haiti a reporta al menos 724 morto, mas cu dobel e 304 reporta e anochi anterior. Al menos 2,800 persona a resulta herida y casi 7mil a keda sin hogar.
Ta spera cu e cantidad di fayecido ta bay aumenta memey di reportenan cu algun bario, unda autoridad ainda no a yega, a keda plat.
Al menos tres area urbano den region sur – Jeremie, Les Cayes y Baraderes – a sufri dañonan mayor, cu miedo cu e daño mas grandi tabata den bario y pueblonan mas cerca di e epicentro.
Mientras organisacionnan caritativo y no gubernamental, y gruponan boluntario a manda hende, suministro y ekipo na Haiti, autoridadnan Haitiano a reitera nan insistencia pa tur ayudo pasa via nan cu nan aprobacion. Edmond a bisa cu gobierno kier evita un ripiticion id e cantidad masivo gasta – y malgasta – na Haiti despues di teremoto 2010.
