1122 caso activo di Covid-19

Dia pa dia e cantidad di casonan di Covid-19 na Aruba ta continua aumenta, den loke ta considera como e ‘di cuatro ola’ di pandemia na nos isla. E ola mas recien aki ya a surpasa tur peak anterior, cu excepcion di e prome peak – dia 16 di september 2020, tempo cu a registra 1,630 caso activo – y ayera a registra 1122 caso activo.

Segun resumen di Departamento di Salubridad Publico DVG relaciona cu e desaroyonan di pandemia di Covid-19 na Aruba, ayera tabatin 123 persona cu a recupera di e malesa causa pa e virus SARS-CoV-2. Ademas a registra 192 caso nobo, di cual 20 ta turista y 172 ta residente. Cu esaki, e cantidad di caso activo ta 1122. E cifranan ta representa un tasa di positividad entre nos residentenan di 31 porciento. E cantidad di fayecido relaciona cu Covid-19 ta 115.

DVG ta enfatisa cu e datonan ta ilustra un aumento continuo di casonan nobo, cu un averahe semanal di 123 caso pa dia, y un averahe di tasa di positividad semanal di 32 porciento pa dia.

Mientras tanto, a informa cu actualmente na Hospital Dr. Horacio Oduber tin 54 persona interna pa ricibi cuido adicional pa infeccion di Covid-19. Di esakinan, siete persona ta den Unidad di Cuido Intensivo ICU, 41 ta riba piso general, 4 riba piso di maternidad (kendenan ta hende muhe na estado), y dos riba pediatria, cual ta piso pa cuido di mucha. Segun DVG, mayoria di persona interna no ta vacuna, ‘y p’esey ta suplica na comunidad pa vacuna si ainda bo no a haci esaki. Vacunacion ta e miho proteccion contra e virus di Covid’.

Encuesta Tocante Interes pa Vacuna na e Parti Caribense di Reino

Mirando e desaroyonan cu e di ‘cuatro ola’ di Covid na Aruba, den e proximo dianan, e teamnan di vacunacion di e diferente islanan di e parti Caribense di Reino, den colaboracion cu Ministerio di Salubridad Publico, Bienestar y Deporte di Hulanda, lo lansa un encuesta tocante interes pa vacuna. Meta di e encuesta ta pa formula strategia cu e teamnan di comunicacion por uza den e ultimo fase di e trayecto di vacunacion. E encuesta ta na encargo di investigadonan local, trahando den colaboracion cu I&O Research.

Na februari 2021, a start e prome etapa di e programa di vacunacion contra Covid-19 riba e islanan BES y e paisnan CAS. Hende di 60 aña of mas y personal di cuido di salud a bay prome. For di april, a amplia e campaña di vacunacion pa inclui tur hende di 18 aña of mas y, for di cuminsamento di e luna aki, ta vacunando esnan di 12-17 aña tambe. Entre tanto, a administra casi 400.000 vacuna na e habitantenan di e islanan.

Segun calculo di RIVM, pa por yega na inmunidad di grupo, awor cu a constata presencia di e variante Delta na Corsou, Aruba, Sint Maarten y Boneiro, mester logra alcansa un nivel di vacunacion di aproximadamente 75 te 85% di e poblacion total. Te asina leu, no a alcansa e nivel aki (di e poblacion total di 12 aña of mas, completamente vacuna). E teamnan di vacunacion riba e isla- y paisnan ta indica cu nan no tin un bista bon fundamenta di kico ta loke ta stroba e grupo cu ainda ta nenga di vacuna of cu ta duda pa haci esey, y cu p’esey nan no sa bon con nan lo por adapta nan maneho di vacunacion of di comunicacion pa logra aumenta e interes pa vacuna mas ainda.

P’esey, Ministerio di VWS, den consulta cu e autoridadnan di salubridad riba e diferente isla- y paisnan di e parti Caribense di Reino, ta bay realisa un investigacion cualitativo na e Islanan ABC y Islariba, mediante entrevista den profundidad y entrevista cu grupo di enfoke, tocante e motibonan cu hende tin pa sea vacuna of no. Lo duna atencion special na e habitantenan di 12-40 aña. Mas aleu, e teamnan di vacunacion riba e isla- y paisnan ta indica cu no ta tur hende ta presenta pa e di dos dosis. Como consecuencia di esey, nan no ta completamente vacuna y p’esey no ta optimalmente protege contra enfermedad grave of morto debi na Covid-19. Cu esey na mente, lo inclui e problematica aki tambe den e encuesta.

E encuesta lo tuma luga na cuminsamento di augustus 2021. Na cuminsamento di september lo presenta e resultadonan na VWS y e teamnan di vacunacion di e isla- y paisnan di e parti Caribense di Reino. A base di resultado di e entrevistanan den profundidad, e investigadonan lo formula conseho concreto di maneho encuanto con por logra aumenta e interes pa vacuna den e parti Caribense di Reino. Lo tene cuenta cu e circunstancianan local di cada isla y pais, entre otro, cuanto capacidad cada team di vacunacion tin pa por ehecuta e consehonan presenta.