Segun resumen di Departamento di Salubridad Publico DVG ayera relaciona cu desaroyonan di pandemia di Covid-19 na Aruba, ayera e cantidad di caso activo tabata 1053.
DVG a informa cu tabatin 69 persona cu a recupera y a registra un total di 137 caso nobo di Covid-19, di cual 5 ta turista y 132 ta residente. Cu esaki e cantidad di caso activo pa ayera tabata 1053, y e cantidad di fayecido relaciona cu Covid-19 a aumenta na 115, cu fayecimento di un residente y un persona no residente. Ambos tabata interna, y lamentablemente no tabata vacuna. E cifranan ta mustra un tasa di positividad entre nos residentenan di 28 porciento.
Manera DVG ta informa, e datonan ta ilustra un aumento continuo di casonan nobo, cu un averahe semanal di 111 caso nobo pa dia, y un averahe di tasa di positividad semanal di 32 porciento pa dia, cu ta sigui aumenta. Autoridadnan di salud ta informa cu un tasa di positividad asina halto ta un indicacion cu tin gran cantidad di caso cu no ta wordo detecta, sea cu ta asintomatico of personanan no ta haci test na momento di haya sintoma.
Mientras tanto, Hospital Dr. Horacio Oduber tin actualmente 46 persona interna. Di esakinan, 7 ta den Unidad di Cuido Intensivo ICU, 35 riba pisa general, 3 riba piso di maternidad (pues hende muhe na estado), y un ta riba piso di pediatria como cu ta trata di un mucha. Datonan di hospital ta ilustra cu di e 46 persona interna pa ricibi tratamento pa Covid-19, 16 persona (36 porciento) ta vacuna cu sea un of dos dosis di e vacuna, y 28 persona (64 porciento) no tin vacuna. Dos di nan, DVG no tabata dispone di nan informacion na momento di duna e resumen.
