Ayera tabata un di e dianan cu Aruba a registra un di e mayor cifranan di casonan di Covid-19 desde cu pandemia a cuminsa na unda Departamento di Salud Publico a confirma cu datonan ta indica un averahe semanal di 113 caso pa dia y un positivity rate di 32% pa dia cu ta sigui aumenta.
Bon Dia Aruba a haya informacion di un fuente cu a declara cu Hospital Dr Horacio Oduber tabata sacando tur pashent di Cuido Intensivo (ICU) cu tin Covid-19 pa manda nan Colombia y hinca mas personanan contagia cu e virus den ICU.
Pa cu esaki, Bon Dia Aruba a puntra Solange Tchong ken ta fungi como PR di AZV tocante esaki y el a confirma e informe inicial cu siman pasa a manda un pashent di ICU pa Colombia pa traha luga na hospital pa pashentnan cu Covid-19.
Di otro banda, Charlaine Huntingtong a bisa pa Bon Dia Aruba cu te ayera atardi e di 4 pashent cu Covid-19 tabata bayendo Colombia y un di 5 tambe por a bay.
“Hospital no ta yen ainda pero keda corda cu nos tin tekort na personal”, Huntintong a señala.
Ta importante pa señala cu mirando e aumento di casonan di coronavirus na Aruba, te ainda minister di Salubridad demisionario Dangui Oduber no a bin cu un declaracion oficial pa pueblo di Aruba y kico ta e situacion na Hospital si casonan lo sigui aumenta, cu no tin suficiente personal pa atende cu e pashentnan ni suficiente espacio den ICU.
Colombia na e momentonan aki ta un di e paisnan cu tin mas casonan positivo y mortonan pa via di Covid-19, te ayera a registra den total casi 5 miyon caso y mas di 123 mil morto, na unda por conclui cu nan mes ta luchando cu e pandemia cu ta asota e pais aki masha fuerte mes.
Fuentenan confiabel a informa Bon Dia Aruba cu ya caba HOH ta den medida di emergencia pa evacua pashent, y por trata di tanto pashent di Covid como otro pashent sin Covid.
