Dialuna atardi a sali e noticia cu CDC a pone Aruba, un biaha mas, na nivel 4 di riesgo di biahe. Den combersacion cu Sra. Ronella Croes, directora di ATA (Aruba Tourism Authority), y tambe cu Sr. Marc Figaroa, director di APA (Aruba Ports Authority), nan ta splica con e noticia aki, e aumento di nivel di riesgo, por afecta e turismo di Aruba y kico ta e plan cu tin pa maneha e situacion.
Sra. Croes ta splica cu e noticia aki tabata anticipa caba y no a cay como un sorpresa grandi. Desde cu Aruba a habri mercado di Merca aña pasa na juli, te cu 13 di juni e aña aki, Aruba tabata riba riesgo nivel 4. “Pa 14 di juni, CDC a duna nos un cambio na nos fabor, el a baha e nivel di riesgo pa Aruba riba nivel 3 y desde e momento eynan nos a sigui traha pa purba convence nan pa nos sigui baha bay pa nivel 2”, el a bisa.
“Pues esey ta loke nos tabata trahando riba dje, hunto cu e cluster medico, pero lamentablemente nan a bolbe haci e cambio y manda nos riba nivel 4, mescos cu a haci pa otro paisnan tambe, entre otro Corsou si mi no ta hera siman pasa”, el a agrega.
Pa aworaki loke ATA ta monitoriando di cerca ta con e variante Delta ta moviendo, kico ta e impacto di esey riba turismo. “Pues prome cu e anochi di CDC ya caba nos tabata bezig den contacto cu esnan cu ta bende Aruba, por ehempel un Expedia, pero tambe cu hotelnan”, Sra. Croes a splica.
“Siman pasa nos a compila un rapport cu tur e feedback cu nos a ricibi y bo por mira cu algun a cuminsa nota cancelacion. Pero gran parti di nan a bisa cu nan no ta notando cu tin cancelacion, pero cu mester duna esaki tempo y mester monitoria esaki di cerca”, el a agrega.
Sra. Croes ta splica tambe cu pa e siman aki, ATA ta bay haci atrobe e mesun sondeo pa wak si tin cambio den e manera con e consumidor ta comportando su mes, si tin cancelacion of no, y nan lo sigui haci esaki den e proximo simannan tambe.
El a señala cu ATA tabata den combersacion cu aeropuerto di Aruba y el a informa cu nan lo haci di nan banda tambe e sondeo bao di aerolineanan tambe, pa asina tin no solamente e feedback di parti di ATA, pero tambe e feedback bao di aerolineanan.
“ATA, como Aruba, ya caba ta invertiendo un suma adicional riba mercado di Merca pa purba pusha esaki, y e ta bin ta duna hopi bon resultado. Nos lo ahusta nos strategia si tin mester, nos tin e flexibilidad pa haci esaki. Nos no ta haciendo esaki ainda, nos ta monitoriando, anto si tin mester nos ta haci esey”, Sra. Croes a indica.
Pa loke ta cifranan pa luna di augustus, e la bisa cu na aña 2019 durante augustus Aruba a ricibi un total di 96 mil bishitante mas o menos. Pa e luna aki, nan ta sperando cu e por ta un total di 90 mil bishitante si tin cancelacion, of nan lo por cera cerca di 94 mil bishitante. Esey ta dos scenario cu tin pa e luna aki, considerando cu tin algun cancelacion caba y nan ta bezig ta controla si mas ta bin acerca.
“Aworaki ta mas bien di ban wak si ta bay tin cancelacion, cuanto cancelacion, con preocupante e situacion ta etc. Mientras tanto nos ta haci apelacion pa hendenan sigui bay vacuna pasobra esey tambe ta hopi importante. Nos ta hopi den dialogo cu sector priva comercial unda ta wak kico por haci di e banda ey tambe. Esaki por ta cosnan manera organisa sesionnan cu DVG unda hendenan por vacuna inmediatamente, cosnan asina, pero tin atencion di e sector comercial pa cu esaki mas cu claro”, Sra. Croes a bisa.
Director di APA, Sr. Marc Figaroa, tambe a duna su reaccion ariba e noticia den un combersacion cu Bon Dia Aruba. E ta splica cu APA tin total confiansa cu e elevacion di Aruba su nivel di riesgo no lo tin un efecto negativo pa e turismo maritimo di nos isla. “Nos a caba di reuni cu algun lineanan di crucero recientemente y te cu awo no tin niun indicacion cu e lineanan di crucero lo tin cancelacion pa motibo di esaki”, el a bisa.
E ta splica tambe cu APA ta den comunicacion continuamente pa asina nan ta riba e mesun pagina pa locual ta trata protocolnan y pa asina proteha Aruba y e liñanan di crucero mes tambe. “E lineanan di crucero a caba di cuminsa recientemente, y pa nan haya obstaculo den nan operacion, tampoco no ta algo cu nan kier wak”, el a bisa.
“Nan ta reforsa tur e reglanan y e protocolnan y si mester crea mas protocolnan adicional nan ta tene esaki na cuenta pa asina proteha tur hende. Nos tabatin nos exigencianan basta estricto caba. APA conhuntamente cu DVG, ATA, Directie Scheepvaart y cu e president di nos cluster den crisisteam, nos a crea protocolnan pa asina nos por acomoda e pasaheronan aki y esaki nos a haci esaki den comunicacion y dialogo cu e lineanan di crucero tambe. Nan tin nan protocol y nos tin nos protocol y e esakinan ta alinea cu otro”, el a agrega.
