Siman cu a pasa tabata un momento importante pa futuro di turismo na Aruba, specificamente pa loke ta trata turismo crucero. Actualmente e lineanan di crucero ta bezig pa haci nan plannan pa resto di 2021 y tambe pa 2022 y 2023.

Un delegacion di Aruba lidera pa Minister demisionario di Turismo, Danguillaume Oduber hunto cu CEO di Oficina di Turismo Aruba (A.T.A.) Ronella Croes, Cruise Manager Mario Arends y di parti di Aruba Ports Authority (APA) Director Marc Figaroa, a reuni cu ehecutivonan di Carnival Cruise Lines, Florida-Caribbean Cruise Association y Royal Caribbean Cruise Lines. Reunionnan a tuma luga na nan cede na Miami. Esaki ta e dos liñanan di crucero cu ta produci mas hopi turistanan crucero pa nos destinacion,y como tal, sigur hopi relevante pa Aruba su industria turistico.

Recientemente operacion di crucero desde puertonan na Florida a re-inicia y lineanan ta hopi activo ta haci e cambionan necesario pa adapta na e situacion di e pandemia mundial.

Durante e acontecimentonan, ehecutivonan di e lineanan crucero a expresa aprecio pa e forma diligente cu Aruba ta maneha e crisis/pandemia y alabes e protocolnan y demas trabao pa re-inicio di turismo crucero den Caribe. Lineanan a keda impresiona cu e grado di vacunacion di Aruba y tambe cu e maneho y recuperacion di turismo.

Debi na e maneho aki, Aruba tabata parti di e prome itinerario den Caribe y nan ta balora e relacion cu nan tin cu Aruba pero tambe e confiansa den nos destinacion.

Naturalmente e situacion actual di e pandemia tin hopi ahustacion cu ta adapta cada rato pa loke ta trata e resto di 2021, pero e lineanan crucero a duna indicacion cu e recuperacion lo por acelera na 2022 tanto den capacidad y den cantidad di barco crucero cu lo ta den operacion y aki ta inclui Aruba den nan itinerario.

Aña 2019 tabata e miho aña pa turismo crucero pa nos destinacion, unda un total di 832.001 pasahero crucero a bishita nos isla. Durante e acontecimentonan di siman pasa, ta planeando e cantidad di calls pa nos isla cual den algun caso por surpasa e nivelnan cu loke 2019 a produci den e industria aki pa Aruba.

Pa loke ta trata e reunionnan cu Carnival Cruise Lines, Aruba ta continua di tin un hopi bon imagen tanto den e comentarionan di nan pasaheronan pero tambe den e percepcion di e agencianan di biahe.

Esaki por wordo mira bek den e rating cu Aruba ta sigui den e top 2 destinacionnan den Caribe, di cual nos ta score un averahe di 9.3 den satisfaccion di e pasaheronan di crucero. Pabien Aruba!

Operacionnan di crucero a demostra di ta bayendo bon den e maneho y pa tal motibo e casonan positivo di COVID-19 ta limita. Asina mes, lineanan di crucero a fortifica nan protocolnan aun mas y actualmente e protocolnan di e industria crucero ta mas stringente cu e medidanan cu Centers for Disease Control & Prevention (CDC).

Gran mayoria di pasaheronan di crucero ta vacuna, cual ta yuda limita e riesgo entre e pasaheronan y pa e comunidad di e destinacionnan cu e barconan di crucero ta bishita.

E delegacion a tuma oportunidad pa meet cu Florida-Caribbean Cruise Association (F-CCA) pa comparti mas informacion y ricibi e apoyo den comunicacion cu e lineanan di crucero y tambe den e area di mercadeo.

Ministerio di Turismo, A.T.A. y APA lo continua hunto pa haci esfuersonan pa recuperacion di nos turismo crucero. Pa nos comunidad ta importante pa nos tur sigui e protocolnan manera stipula door di diferente instancianan. Pasobra ta hunto nos lo vence pa nos isla y su turismo por sigui florece.