Dos Code Red…Y ken ta haci kico…?

Manera anticipa nos ta bayendo den direccion robez cu nos situacion di Covid-19. Dialuna 9 di augustus nos ta rumbo pa 900 caso activo, sin cu tin un paro na vista den e desaroyo negativo aki. Mientras na inicio di e aumento di caso algun siman pasa ainda e casonan tabata igualmente reparti entre hende local y bishitante, na e momento aki e gran mayoria ta persona local, un señal cla cu nos no mester specula mas si e variante Delta nobo ta presente, el a tuma rienda caba. Manera nos por a ripara den noticia di ayera, e reaccion di maximo autoridad Mericano CDC no a tarda pa bin, desde ayera tin un recomendacion pa no biaha pa Aruba, pa cual a pone ‘Code Red’. Si mester biaha mes, anto ta recomenda pa bo ta completamente vacuna. No ta promer biaha cu nos ta den e situacion aki; Aruba tabata den e categoria 4 aki pa un bon parti di e crisis y te recientemente a baha pa Code oraño. E diferencia ta e aspecto di e variante ‘Delta’ cu por percura pa un situacion diferente, cu por afecta principalmente e parti no vacuna di e poblacion. Esaki principalmente ta e personanan mas hoben, mientras cu gran parti di esnan di mas edad a keda vacuna. Di tur manera, lo mester haci algo urgentemente y no spera te ora cu hospital ta yen pa nos bay haci loke nos ta tradicionalmente bon aden: crisis management.

Ademas, si nos no logra cambia e situacion negativo di e momento aki, por ta cu esaki no ta keda sin consecuencia pa nos situacion economico. Di mes caba nos ta bayendo den direccion di e lunanan unda ocupacion di hotelnan ta poco menos, pa aumenta atrobe rumbo fin di aña, y un accion di banda Mericano cu por limita e cantidad di bishitante cu lo yega den e proximo tempo, por afecta e recuperacion economico parcial cu nos a mira den e ultimo lunanan seriamente. Loke nos a trata di ilustra den publicacion di cifranan cu ta disponible te awor ta cu e recuperacion no a yega pa tur hende ainda. Na SVb tabatin na inicio di juli ultimo ainda dos mil empleado menos registra cu na inicio di 2020, aunke esey ta solamente un parti di e personanan desemplea. Ainda ta keda e problema di e cantidad di hende cu ta trahando den e circuito semilegal o completamente ilegal, unda nos no tin te awe un idea con grandi esaki ta. Di tur manera, hasta cu un segundo mitar di aña economicamente faborable, nos tin suficiente reto economico, cu ta haci cu e apoyo financiero di gobierno – placa cu mester fia – ta keda necesario pa tene hopi empresa riba pia ainda. Anto sin un di dos emergencia di Covid-19.

E otro ‘Code Red’ di ayera no ta toca nos so, sino henter mundo. Cambionan den clima mundial ta acelerando, cu consecuencia grandi pa temperatura mas halto y nivel di lama, entre otro. E temperatura mas halto di awa di lama tin consecuencia serio pa bida maritimo, tanto pa flora como fauna. E reaccion completamente robez lo ta pa pensa cu esaki ta, manera nan ta yam’e na Hulanda un ’ver van mijn bed show’. Cos cu ta pasa na otro parti di mundo pero e ‘pida baranca bendiciona aki’ ta keda libra di tur esey. Loke ta importante pa comprende di cambio di clima ta cu e no ta un fenomeno nobo cu ta yega na bo porta si of no. Cambio di clima, temperatura mas halto, yobida excesivo intercambia cu secura severo por ehemplo, ta bin haci mas daño riba e cosnan cu ta daña caba den un determinado situacion. Por ehemplo, si ya caba na un pais a permiti abusa di naturaleza y tin problema caba di perdida di tereno di cultivo pa motibo di erosion, e cambio di clima lo bin haci e situacion mas grave ainda. Es decir, mas base tin disponible pa e efecto crece ariba, mas grave e consecuencianan lo ta despues. Y mas costoso eventual reparacion lo ta finalmente, si acaso ta situacion cu por ta reversible.

Y ta hustamente aki nos mayor preocupacion mester ta, pasobra nos no ta mira un maneho di medio ambiente cu ta tuma e desaroyonan aki na cuenta. Loke si nos por observa ta un silencio grandi di e instancianan cu nos tin cu mester ta operativo y cu voz fuerte na vanguardia di e asuntonan aki. Y ta aki nos ta mira e daño grandi cu ta tuma lugar ora mandatarionan ta exigi silencio di nan mientras ta nan tarea pa papia – y skirbi – con nos mester enfrenta e problemanan aki. Nos por observa cu hustamente unda gobierno kier duna actividad economico, cu ta abusivo y dañino, mas espacio pa nan gana placa pa gobierno tambe haya su ‘fair share’ ta unda e problemanan mas grandi ta surgi. Contrario na e promer Code Red pa Covid-19, cu ta toca nos bienestar economico a corto y mediano plazo, e ultimo Code Red aki ta toca nos economia y comunidad mas a largo plazo, pero no ta pasobra ta mas a largo plazo, no mester haci nada awor. Loke ta realmente preocupante, pa tur dos Code Red, ta e lentitud cu por observa den reaccion di esnan responsable.